ନୂଆପଡ଼ା ରେ ପୁଷ୍ଟିଶସ୍ୟ ଚାଷ ର ବିକାଶ: ଆଧୁନିକ ମଞ୍ଜି ବୁଣା ଯନ୍ତ୍ରର ସଫଳ କ୍ଷେତ୍ର ପ୍ରଦର୍ଶନ ଓ ପ୍ରଶିକ୍ଷଣ ଶିବିର।

ନୂଆପଡ଼ା -୧୬/୭- ରାଜ୍ୟରେ ପୁଷ୍ଟି ଶସ୍ୟ ଚାଷକୁ ଅଧିକ ଲାଭଜନକ, ବୈଜ୍ଞାନିକ ଏବଂ ଜଳବାୟୁ ସହନଶୀଳ କରିବା ଦିଗରେ ଆଉ ଏକ ସଫଳ ପଦକ୍ଷେପ ଗ୍ରହଣ କରାଯାଇଛି। ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ (OUAT) ଏବଂ ହାଇଦ୍ରାବାଦର ଇକ୍ରିସାଟ୍ (ICRISAT)ର ମିଳିତ ସହଯୋଗରେ, ରାଷ୍ଟ୍ରୀୟ କୃଷି ବିକାଶ ଯୋଜନା (RKVY) ଅଧୀନରେ “ଓଡ଼ିଶାର ଢିପ ଜମିରେ ପୁଷ୍ଟିଶସ୍ୟ ଚାଷର ବିକାଶ” ପ୍ରକଳ୍ପ ଆଗେଇ ଚାଲିଛି। ଏହି କ୍ରମରେ ନୂଆପଡ଼ା ଜିଲ୍ଲା କୋମନା ବ୍ଲକର ଦରଲିପଡ଼ା ଓ ସମରସିଙ୍ଗ ଗ୍ରାମରେ ଚାଷୀଙ୍କ ପାଇଁ ଏକ ବ୍ୟବହାରିକ ପ୍ରଶିକ୍ଷଣ ଓ ଯନ୍ତ୍ରପାତି ପ୍ରଦର୍ଶନୀ ଶିବିର ଅନୁଷ୍ଠିତ ହୋଇଯାଇଛି।
କୋମନା ବ୍ଲକ ଅନ୍ତର୍ଗତ ଦର୍ଲିପଡ଼ା ଓ ସମରଶିଙ୍ଗ ଗ୍ରାମ ର ପ୍ରଗତିଶୀଳ ଚାଷୀ ବଂଶିଧର ମାଝୀ ଏବଂ ଲଳିତ ରଣା ଙ୍କ ଜମିରେ ଟ୍ରାକ୍ଟର ଚାଳିତ ୯-ଧାଡ଼ିଆ ପୁଷ୍ଟିଶସ୍ୟ ମଞ୍ଜି ଓ ସାର ବୁଣା ଯନ୍ତ୍ର ସହିତ ୨-ଧାଡ଼ିଆ ହସ୍ତଚାଳିତ ମଞ୍ଜି ବୁଣା ଯନ୍ତ୍ରର ସଫଳ କ୍ଷେତ୍ର ପ୍ରଦର୍ଶନ କରାଯାଇଥିଲା। ଏହି ଅବସରରେ କାଙ୍ଗୁ ଓ ଜନ୍ହା ଭଳି ପୁଷ୍ଟିଶସ୍ୟ ମଞ୍ଜି ବୁଣାର ପ୍ରତ୍ୟକ୍ଷ ଡେମୋଷ୍ଟ୍ରେସନ୍ ଦେଖିବାକୁ ମିଳିଥିଲା।କମ୍ ସମୟ, କମ୍ ଖର୍ଚ୍ଚରେ ଅଧିକ ଲାଭ।
କୃଷି ବିଶେଷଜ୍ଞଙ୍କ ମତରେ, ପାରମ୍ପରିକ ପଦ୍ଧତିରେ ଧାଡ଼ି ବୁଣା ପାଇଁ ଅଧିକ ଶ୍ରମିକ ଓ ସମୟ ଲାଗୁଥିବା ବେଳେ ଏହି ଆଧୁନିକ ଯନ୍ତ୍ର ସାହାଯ୍ୟରେ:
ମାତ୍ର ୧ ଘଣ୍ଟା ମଧ୍ୟରେ ସଠିକ ବ୍ୟବଧାନରେ ମଞ୍ଜି ବୁଣା ସମ୍ଭବ ହେଉଛି।
କମ୍ ମଞ୍ଜି, କମ୍ ଖର୍ଚ୍ଚ ଏବଂ କମ୍ ଶ୍ରମରେ ଚାଷ କାର୍ଯ୍ୟ ସହଜ ହେଉଛି।
ସମାନ ଭାବେ ଅଙ୍କୁରୋଦ୍ଗମ ହେବା ସହ ଅନ୍ତର୍ଚାଷ ପ୍ରକ୍ରିୟା ସହଜ ହେବ ଏବଂ ଉତ୍ପାଦନ ବୃଦ୍ଧି ପାଇବ।ଚାଷୀଙ୍କୁ ପ୍ରୋତ୍ସାହନ: ପ୍ରଶିକ୍ଷଣ ସମୟରେ ଚାଷୀମାନଙ୍କୁ ଯନ୍ତ୍ରର କାଲିବ୍ରେସନ୍, ମଞ୍ଜିର ପରିମାଣ ନିର୍ଦ୍ଧାରଣ, ବୁଣାର ଗଭୀରତା ଓ ସଠିକ ବ୍ୟବହାର ସମ୍ପର୍କରେ ତାଲିମ ଦିଆଯିବା ସହ ୪ ଟି ହସ୍ତଚାଳିତ ଦୁଇ ଧାଡ଼ିଆ ମଞ୍ଜି ବୁଣା ଯନ୍ତ୍ର ମଧ୍ୟ ବଣ୍ଟନ କରାଯାଇଥିଲା।
ଏ ଅବସର ରେ ବୈଜ୍ଞାନିକ ଓ ପ୍ରଶାସନିକ ଅଧିକାରୀଙ୍କ ଉପସ୍ଥିତି।
ଏହି କାର୍ଯ୍ୟକ୍ରମରେ ଇକ୍ରିସାଟ୍‌ର କୃଷି ଯାନ୍ତ୍ରିକୀକରଣ ପରାମର୍ଶଦାତା ଡ଼ା. ସଂଗ୍ରାମ କେଶରୀ ସ୍ୱାଇଁ, ମୁଖ୍ୟ ବୈଜ୍ଞାନିକ ଡ଼ା. ଗଜାନନ ସାୱରଗାଓଙ୍କାର, କେଭିକେ ନୂଆପଡ଼ା ର ବରିଷ୍ଠ ବୈଜ୍ଞାନିକ ଲବ ସୋରେନ ଏବଂ ନିର୍ବାହୀ କୃଷି ଯନ୍ତ୍ରୀ ଇଂ. ଅଜୟ କୁମାର ମାରାଣ୍ଡି ପ୍ରମୁଖ ଉପସ୍ଥିତ ଥିଲେ।
ଏହାସହ ସହକାରୀ କୃଷି ଯନ୍ତ୍ରୀ ଇଂ. ସନ୍ଦୀପ କୁମାର ଜୋଜୋ, ଇଂ. ସୌମ୍ୟା ସୁରଭି ଶବର, ଇଂ. ରଶ୍ମି ରଞ୍ଜନ ନାୟକ, ଏଏଓ ସୌଦାମିନୀ ରାୟ, ଏବଂ ଇକ୍ରିସାଟ୍‌ର ପ୍ରତିନିଧି ରାମ ବିକାଶ ବର୍ମା, ଡ଼ା. ରୋହନ କ୍ଲୋପାଲେ ଓ ଋଷିକେଶ ସାହୁ ଯୋଗଦେଇ ଚାଷୀଙ୍କୁ ଉନ୍ନତ ଚାଷ ପ୍ରଣାଳୀ ଓ ସରକାରୀ ରିହାତି ସମ୍ପର୍କରେ ସୂଚନା ଦେଇଥିଲେ।
ରାଜ୍ୟ ସରକାରଙ୍କ ଜଳବାୟୁ ସହନଶୀଳ କୃଷି ନୀତିକୁ ସଫଳ କରିବା ଦିଗରେ ଏହିପରି ବୈଜ୍ଞାନିକ ତାଲିମ ଏବଂ ଆଧୁନିକ ଯନ୍ତ୍ରପାତିର ବ୍ୟବହାର ନୂଆପଡ଼ା ଜିଲ୍ଲାର ଚାଷୀଙ୍କ ମଧ୍ୟରେ ଏକ ନୂଆ ଆଶା ସଞ୍ଚାର କରିଛି।