ଚୌହାନ୍ ଗଣା ସମାଜ ର ବ୍ଲକ୍ ସ୍ତରୀୟ ପଦାଧିକାରୀ ନିର୍ବାଚନ ସଫଳ: ନୂତନ ନେତୃତ୍ୱ ଙ୍କୁ ମିଳିଲା ଦାୟିତ୍ୱ।

ନୂଆପଡ଼ା -୧୬/୦୭- ନୂଆପଡ଼ା ବ୍ଲକ୍ ଚୌହାନ୍ ଗଣା ସମାଜର ବ୍ଲକ୍ ସ୍ତରୀୟ ପଦାଧିକାରୀ ନିର୍ବାଚନ ଶାନ୍ତି ଶୃଙ୍ଖଳା ପରିବେଶରେ ସଫଳତାର ସହ ସମାପନ ହୋଇଛି। ସମାଜର ବରିଷ୍ଠ ନେତୃବୃନ୍ଦ ଙ୍କ ତତ୍ତ୍ୱାବଧାନରେ ଅନୁଷ୍ଠିତ ଏହି ନିର୍ବାଚନ ପ୍ରକ୍ରିୟା ସମ୍ପୂର୍ଣ୍ଣ ସ୍ୱଚ୍ଛ, ଗଣତାନ୍ତ୍ରିକ ଓ ଶୃଙ୍ଖଳିତ ଭାବେ ସମ୍ପନ୍ନ ହୋଇଥିଲା।ନିର୍ବାଚନ ପରିଚାଳନାର ଦାୟିତ୍ୱ ଜିଲ୍ଲା ଉପସଭାପତି ତଥା ବିଜେପି ଏସ୍‌ସି ମୋର୍ଚ୍ଚା ଜିଲ୍ଲା ସଭାପତି ରାଧେ ଶ୍ୟାମ ବାଗ, ଅମର ସିଂହ ମହାନନ୍ଦ, ରାମ ଚରଣ ତାଣ୍ଡି ଏବଂ ଭୋଗ ସିଂ ବାଗ ସଫଳତାର ସହ ତୁଲାଇଥିଲେ। ସେମାନଙ୍କ ନେତୃତ୍ୱରେ ସମଗ୍ର ନିର୍ବାଚନ ପ୍ରକ୍ରିୟା ସୁଚାରୁ ଭାବେ ସମ୍ପନ୍ନ ହୋଇଥିଲା।
ନିର୍ବାଚନ ଫଳାଫଳ ଅନୁଯାୟୀ ମାଧୋ ଲାଲ ଚୌହାନ ବ୍ଲକ୍ ସଭାପତି, ରାଜୁ ଚୌହାନ ଉପସଭାପତି, ହେମୁ ନିଆଲ ସାଧାରଣ ସମ୍ପାଦକ ଏବଂ ଗିରିଧାରୀ ବାଗ ସମ୍ପାଦକ ଭାବେ ନିର୍ବାଚିତ ହୋଇଛନ୍ତି। ନବନିର୍ବାଚିତ ପଦାଧିକାରୀମାନ ଙ୍କୁ ସମାଜର ସଦସ୍ୟମାନେ ଶୁଭେଚ୍ଛା ଜଣାଇବା ସହ ସମାଜର ସର୍ବାଙ୍ଗୀନ ବିକାଶ ଦିଗରେ ସେମାନଙ୍କ ସଫଳ କାର୍ଯ୍ୟକାଳ କାମନା କରିଛନ୍ତି।
ଏହି ନିର୍ବାଚନରେ ସମାଜର ଶତାଧିକ ପୁରୁଷ ଓ ମହିଳା ସଦସ୍ୟ ଉତ୍ସାହର ସହ ଅଂଶଗ୍ରହଣ କରି ଗଣତାନ୍ତ୍ରିକ ପ୍ରକ୍ରିୟା ପ୍ରତି ଆସ୍ଥା ଓ ଏକତାର ପରିଚୟ ଦେଇଥିଲେ। ସମଗ୍ର କାର୍ଯ୍ୟକ୍ରମ ସୌହାର୍ଦ୍ଦ ପୂର୍ଣ୍ଣ ପରିବେଶରେ ସମାପ୍ତ ହୋଇଥିବାରୁ ସମାଜର ସମସ୍ତ ସଦସ୍ୟଙ୍କ ମଧ୍ୟରେ ଖୁସିର ମହୋଲ ଦେଖିବାକୁ ମିଳିଥିଲା।