ରାମ ମନ୍ଦିର ଦାନ ପାଣ୍ଠିରେ ଅନିୟମିତତା ପ୍ରସଙ୍ଗ : ଜିଲ୍ଲା କଂଗ୍ରେସର ସାମ୍ବାଦିକ ସମ୍ମିଳନୀ, ସରକାରଙ୍କୁ ଉଠାଇଲା ଏକାଧିକ ପ୍ରଶ୍ନ।

ନୂଆପଡ଼ା -୧୬/୦୭- ଶ୍ରୀରାମ ଜନ୍ମଭୂମି ମନ୍ଦିର ନିର୍ମାଣ ପାଇଁ ସଂଗ୍ରହ ହୋଇଥିବା ଦାନ ପାଣ୍ଠିରେ ଆର୍ଥିକ ଅନିୟମିତତା କୁ ନେଇ ଜିଲ୍ଲା କଂଗ୍ରେସ ପକ୍ଷରୁ ନୂଆପଡ଼ା ଜିଲ୍ଲା କଂଗ୍ରେସ କାର୍ଯ୍ୟାଳୟ ଠାରେ ଏକ ସାମ୍ବାଦିକ ସମ୍ମିଳନୀ ଗତକାଲି ଅନୁଷ୍ଠିତ ହୋଇଯାଇଛି। ଜିଲ୍ଲା କଂଗ୍ରେସ ସଭାପତି ଘାସିରାମ ମାଝିଙ୍କ ସଭାପତିତ୍ୱରେ ଅନୁଷ୍ଠିତ ଏହି ପ୍ରେସ୍ ମିଟ୍‌ ରେ କଂଗ୍ରେସ ନେତୃବୃନ୍ଦ କେନ୍ଦ୍ର ସରକାରଙ୍କୁ ଟାର୍ଗେଟ କରି ଏକାଧିକ ପ୍ରଶ୍ନ ଉଠାଇବା ସହ ସ୍ୱାଧୀନ ତଦନ୍ତ ଦାବି କରିଛନ୍ତି।
ସାମ୍ବାଦିକ ସମ୍ମିଳନୀରେ ନେତୃବୃନ୍ଦ କହିଥିଲେ ଯେ, ଦେଶର କୋଟି କୋଟି ଶ୍ରଦ୍ଧାଳୁ ନିଜର ଆସ୍ଥା ଓ ବିଶ୍ୱାସର ପ୍ରତୀକ ଭାବେ ରାମ ମନ୍ଦିର ପାଇଁ ଦାନ କରିଥିଲେ। ଏହି ପବିତ୍ର ଦାନ ପାଣ୍ଠିରେ କଥିତ ଅନିୟମିତତା ଘଟିଥିବା ଅଭିଯୋଗ କେବଳ ଆର୍ଥିକ ବିଷୟ ନୁହେଁ, ବରଂ କୋଟି କୋଟି ଭକ୍ତଙ୍କ ଧାର୍ମିକ ଭାବନା ସହ ଜଡ଼ିତ ବୋଲି ସେମାନେ ମତ ପ୍ରଦାନ କରିଥିଲେ।
ପ୍ରେସ୍ ମିଟ୍‌ରେ କଂଗ୍ରେସ ପକ୍ଷରୁ ସରକାରଙ୍କ ସମ୍ମୁଖରେ ତିନୋଟି ପ୍ରମୁଖ ପ୍ରଶ୍ନ ରଖାଯାଇଥିଲା— କଥିତ ଅନିୟମିତତା ପାଇଁ ଦାୟୀ କିଏ, ଟ୍ରଷ୍ଟର କିଛି ପଦାଧିକାରୀଙ୍କ ଇସ୍ତଫା କାହିଁକି ଗ୍ରହଣ କରାଗଲା ଏବଂ ସୁପ୍ରିମକୋର୍ଟଙ୍କ ତତ୍ତ୍ୱାବଧାନ ରେ ସ୍ୱାଧୀନ ନ୍ୟାୟିକ ତଦନ୍ତ ପ୍ରତି ସରକାର ଆଗ୍ରହୀ କାହିଁକି ନୁହେଁ ? ନେତୃବୃନ୍ଦଙ୍କ କହିବା ଅନୁସାରେ, କଥିତ ଘଟଣାର ସତ୍ୟାସତ୍ୟ ସାମ୍ନାକୁ ଆଣିବା ପାଇଁ ସୁପ୍ରିମକୋର୍ଟଙ୍କ ତତ୍ତ୍ୱାବଧାନରେ ସ୍ୱାଧୀନ ନ୍ୟାୟିକ ତଦନ୍ତ, ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ,ଟ୍ରଷ୍ଟର ପୁନର୍ଗଠନ ଏବଂ ସମସ୍ତ ଦାନ ଓ ବ୍ୟୟର ଫୋରେନ୍ସିକ ଅଡିଟ୍ କରାଯାଇ ରିପୋର୍ଟ ସାର୍ବଜନୀନ କରିବାକୁ ଦାବି କରାଯାଇଛି।
ଏହି ସାମ୍ବାଦିକ ସମ୍ମିଳନୀରେ ଜିଲ୍ଲା କଂଗ୍ରେସ ସଭାପତି ଘାସିରାମ ମାଝି, ଉପ ସଭାପତି ଭରତଲାଲ ରାଉତ, ସାଧାରଣ ସମ୍ପାଦକ ସୁଧୀର ମିଶ୍ର, ରାଜ୍ୟ କିଷାନ ସେଲ ଉପ ସଭାପତି ଆଲୋକ ଗୁରୁ, ବରିଷ୍ଠ ନେତା ରବି ମଙ୍ଗରାଜ, ଜିଲ୍ଲା ସମ୍ପାଦକ ଅନିଲ ପଟେଲ, ହରିଶ ମାଝୀ, ବୋଡେ଼ନ ବ୍ଲକ ସଭାପତି ଭାଗିରଥି ଦଣ୍ଡସେନା, ସନ୍ନି ସାହୁ, କିଷାନ ସେଲ ଜିଲ୍ଲା ସଭାପତି ଇସାକ ମହମ୍ମଦ, ଆଇଟି ସେଲ ସଭାପତି ଭକ୍ତ ଶବର,ଜିତୁ ସାହୁ ପ୍ରମୁଖ ଉପସ୍ଥିତ ଥିଲେ।