ବଡ଼ ଦୁର୍ଘଟଣାକୁ ଆବାହନ! ବୋଡ଼େନ ବସଷ୍ଟାଣ୍ଡ ଉପରେ ମରଣଯନ୍ତା ସାଜିଛି ଖୋଲା ବିଜୁଳି ତାର : ବିଭାଗ ଶୋଇଛି ନା ଶୋଇବା ର ଅଭିନୟ କରୁଛି?

ନୂଆପଡ଼ା -୨୦/୭- ନୂଆପଡ଼ା ଜିଲ୍ଲା ବୋଡ଼େନ ବ୍ଲକ୍ ସଦର ମହକୁମାର ସବୁଠାରୁ ବ୍ୟସ୍ତବହୁଳ ଅଞ୍ଚଳ ଏବେ ସେଲ୍ଫି ଜୋନ୍ ନୁହେଁ, ବରଂ ‘ଡେଞ୍ଜର ଜୋନ୍’ ପାଲଟିଛି! ଏଠାକାର ସ୍ଥାନୀୟ ବସଷ୍ଟାଣ୍ଡ ଓ ଆଖପାଖ ବିଲଡିଂ ଉପରେ ବିପଦଜନକ ଭାବେ ଝୁଲି ରହିଛି ପ୍ରାଣଘାତୀ 11 କେଭି ଏବଂ 440 ଭୋଲ୍ଟ ର ଖୋଲା ବିଦ୍ୟୁତ୍ ତାର।
କେତେବେଳେ ଯେ କେଉଁ ମୁହୂର୍ତ୍ତରେ ଏଠାରେ ଏକ ବଡ଼ ଧରଣର ଅଘଟଣ ଘଟିବ ଏବଂ କାହାର ଜୀବନ ଯିବ, ତାହା କହିବା ମୁସ୍କିଲ୍।
ଜନସାଧାରଣଙ୍କ ମଧ୍ୟରେ ତୀବ୍ର ଅସନ୍ତୋଷ
ପ୍ରତ୍ୟେକ ଦିନ ଏହି ବସଷ୍ଟାଣ୍ଡ ଦେଇ ଶତାଧିକ ଭାରୀଯାନ, ଯାତ୍ରୀବାହୀ ବସ ଏବଂ ହଜାର ହଜାର ସ୍ଥାନୀୟ ଲୋକେ ଯାତାୟାତ କରୁଛନ୍ତି। ଆଶ୍ଚର୍ଯ୍ୟର କଥା ହେଉଛି, ବୋଡ଼େନ ବିଜୁଳି ବିଭାଗର ଆଖି ଆଗରେ ଏହି ସଙ୍ଗୀନ ସ୍ଥିତି ଥିଲେ ମଧ୍ୟ ବିଭାଗୀୟ ଅଧିକାରୀମାନେ ସମ୍ପୂର୍ଣ୍ଣ କିଂକର୍ତ୍ତବ୍ୟବିମୂଢ଼! ସବୁ ଦେଖି ମଧ୍ୟ ନଦେଖିଲା ଭଳି ଅଭିନୟ କରୁଥିବା ନେଇ ସ୍ଥାନୀୟ ଲୋକଙ୍କ ମଧ୍ୟରେ ଜୋରଦାର ଚର୍ଚ୍ଚା ଓ ଅସନ୍ତୋଷ ପ୍ରକାଶ ପାଇଛି।
“ଆମେ କେଉଁ ଦିନ ଏକ ବଡ଼ ବିପଦର ସାମ୍ନା କରିବୁ, ସେଥିପାଇଁ କଣ ବିଦ୍ୟୁତ୍ ବିଭାଗ ଅପେକ୍ଷା କରିଛି ? ପ୍ରଶାସନ ତୁରନ୍ତ ଚେତିବା ଦରକାର।” — ସ୍ଥାନୀୟ ବାସିନ୍ଦାମାନେ ଅଭିଯୋଗ କରିଛନ୍ତି।
ତୁରନ୍ତ କେବୁଲ୍ ତାର ଲଗାଇବାକୁ ଜନସାଧାରଣଙ୍କ ଦାବି।
ଅଞ୍ଚଳବାସୀଙ୍କ ଜୀବନକୁ ବାଜି ଲଗାଇ ବିଭାଗ ଯେଉଁ ସାଂଘାତିକ ଖେଳ ଖେଳୁଛି, ତାହାକୁ ନେଇ ଏବେ ଜନ ଆନ୍ଦୋଳନର ମାହୋଲ ସୃଷ୍ଟି ହେଲାଣି। ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏହି ସମସ୍ୟାକୁ ଗମ୍ଭୀରତାର ସହ ନେଇ ଅତିଶୀଘ୍ର ଖୋଲା ବିଜୁଳି ତାର ବଦଳରେ ସୁରକ୍ଷିତ କେବୁଲ୍ ତାର ଲଗାନ୍ତୁ ଏବଂ ସମଗ୍ର ଅଞ୍ଚଳକୁ ବିପଦ ମୁକ୍ତ କରନ୍ତୁ ବୋଲି ସାଧାରଣରେ ଦୃଢ଼ ଦାବି ହେଉଛି। ଯଦି ତୁରନ୍ତ ପଦକ୍ଷେପ ନିଆନଯାଏ, ତେବେ ଆଗାମୀ ଦିନରେ ପରିସ୍ଥିତି ଉଗ୍ର ରୂପ ଧାରଣ କରିପାରେ।