ବିଜେଡିରେ ବଡ଼ କାର୍ଯ୍ୟାନୁଷ୍ଠାନ : ଦଳରୁ ନିଲମ୍ବିତ ହେଲେ ଜିଲ୍ଲା ପରିଷଦ ସଦସ୍ୟ ମାଲ୍ୟବନ୍ତ ସୁନା।

ନୂଆପଡ଼ା -୨୫/୭ – ନୂଆପଡ଼ା ଜିଲ୍ଲା ରାଜନୀତିରେ ଏକ ବଡ଼ ଧରଣର ଘଟଣା ସାମ୍ନାକୁ ଆସିଛି। ବିଜୁ ଜନତା ଦଳ (ବିଜେଡି) ପକ୍ଷରୁ ଖଡ଼ିଆଳ ବ୍ଲକ ଅନ୍ତର୍ଗତ ଜିଲ୍ଲା ପରିଷଦ ଜୋନ୍–୬ର ସଦସ୍ୟ ମାଲ୍ୟବନ୍ତ ସୁନାଙ୍କୁ ଦଳରୁ ତୁରନ୍ତ ପ୍ରଭାବରୁ ନିଲମ୍ବନ କରାଯାଇଛି। ଦଳ ବିରୋଧୀ କାର୍ଯ୍ୟକଳାପରେ ସମ୍ପୃକ୍ତ ଥିବା ଅଭିଯୋଗ ଆଧାରରେ ଏହି କଠୋର ପଦକ୍ଷେପ ନିଆଯାଇଥିବା ଦଳ ପକ୍ଷରୁ ପ୍ରକାଶିତ ନିଲମ୍ବନ ଆଦେଶରେ ଉଲ୍ଲେଖ ରହିଛି।
ବିଜେଡି ରାଜ୍ୟ ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ଏହି ନିଷ୍ପତ୍ତି ନିଆଯାଇଥିବା ବେଳେ, ଦଳର ସାଧାରଣ ସମ୍ପାଦକ ବିଜୟ ନାୟକ ସ୍ୱାକ୍ଷରିତ ଅଫିସ୍ ଆଦେଶ ଗତ କାଲି ପ୍ରକାଶ ପାଇଛି। ଆଦେଶ ଅନୁଯାୟୀ, ନିଲମ୍ବନ ତୁରନ୍ତ କାର୍ଯ୍ୟକାରୀ ହୋଇଛି।

ଅନ୍ୟପଟେ, ନିଲମ୍ବନ ପରେ ମାଲ୍ୟବନ୍ତ ସୁନା ଏକ ଭିଡିଓ ବାର୍ତ୍ତା ଜାରି କରି ନିଜ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଯେ, ଗତ ଆଠ ମାସରୁ ଅଧିକ ସମୟ ଧରି ସେ ବିଜେଡିର ଦଳୀୟ କାର୍ଯ୍ୟକଳାପରେ ଯୋଗଦେଇନଥିଲେ ଏବଂ ଦଳର କିଛି ନେତୃମଣ୍ଡଳୀଙ୍କ ପକ୍ଷରୁ ଅବହେଳାର ଶିକାର ହୋଇଥିବା ଅଭିଯୋଗ ମଧ୍ୟ କରିଛନ୍ତି।
ଏହି ଘଟଣା ପରେ ନୂଆପଡ଼ା ଜିଲ୍ଲାର ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି। ଆଗାମୀ ଦିନରେ ଏହାର ରାଜନୈତିକ ପ୍ରଭାବ କିପରି ପଡ଼ିବ, ସେଥିପାଇଁ ସମସ୍ତଙ୍କ ନଜର ରହିଛି।