ସିନାପାଲି ଜଗନ୍ନାଥ ମନ୍ଦିରରେ ଭକ୍ତିମୟ ପରିବେଶ : ରଥାରୂଢ଼ ଚତୁର୍ଦ୍ଧା ମୂର୍ତ୍ତିଙ୍କ ବିରଳ ସୁନାବେଶ, ନୀଳାଦ୍ରି ବିଜେ ସହ ସମ୍ପନ୍ନ ହେଲା ନବଦିନାତ୍ମକ ରଥଯାତ୍ରା।

ନୂଆପଡା -୨୫/୭ – ଗତକାଲି ଶ୍ରୀଜିଉଙ୍କ ବାହୁଡ଼ା ଯାତ୍ରା ପରେ ଆଜି ଶନିବାର ପୂର୍ବାହ୍ଣରେ ସିନାପାଲି ଜଗନ୍ନାଥ ମନ୍ଦିର ପ୍ରାଙ୍ଗଣରେ ରଥାରୂଢ଼ ଚତୁର୍ଦ୍ଧା ମୂର୍ତ୍ତିଙ୍କ ବିରଳ ସୁନାବେଶ ନୀତି ଅତ୍ୟନ୍ତ ଭକ୍ତିଭାବ ଓ ଆଡ଼ମ୍ବରର ସହିତ ଅନୁଷ୍ଠିତ ହୋଇଛି। ପରମ୍ପରା ଅନୁଯାୟୀ ମନ୍ଦିର ସେବାୟତମାନେ ପ୍ରଭୁ ବଳଭଦ୍ର, ଦେବୀ ସୁଭଦ୍ରା ଓ ମହାପ୍ରଭୁ ଜଗନ୍ନାଥଙ୍କୁ ସୁନା ଓ ରୂପାର କିରୀଟ, ଓଢ଼ିଆଣୀ, ଶ୍ରୀଭୁଜ, ଶ୍ରୀପୟର, ମାଳି, କମରପଟି, ଚକ୍ର, କୁଣ୍ଡଳ ସମେତ ବିଭିନ୍ନ ଅଲଙ୍କାରରେ ସୁସଜ୍ଜିତ କରିଥିଲେ।
ପରେ ଅପରାହ୍ଣରେ ତିନି ରଥ ଉପରେ ପାରମ୍ପରିକ ଅଧରପଣା ନୀତି ସମ୍ପନ୍ନ ହୋଇଥିଲା। ସନ୍ଧ୍ୟାବେଳେ ନୀଳାଦ୍ରି ବିଜେ ନୀତି ସହ ଏବର୍ଷର ନବଦିନାତ୍ମକ ଶ୍ରୀଜିଉଙ୍କ ରଥଯାତ୍ରା ମହାସମାରୋହରେ ସମାପ୍ତ ହୋଇଥିଲା। ଏହି ସମସ୍ତ ପବିତ୍ର ନୀତି ଦର୍ଶନ ପାଇଁ ମନ୍ଦିର ପରିସରରେ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ଦେଖିବାକୁ ମିଳିଥିଲା।
ଗତକାଲି ବାହୁଡ଼ା ଯାତ୍ରାରେ ମହାପ୍ରଭୁଙ୍କ ରଥ ମନ୍ଦିର ନିକଟରେ ପହଞ୍ଚିବା ପରେ ସାମୂହିକ ନୂଆଖାଇ ଭେଟଘାଟ ପରିବାର ପକ୍ଷରୁ ଭକ୍ତିମୟ ଭଜନ ସମାରୋହର ଆୟୋଜନ କରାଯାଇଥିଲା, ଯାହା ସମଗ୍ର ପରିବେଶକୁ ଆଧ୍ୟାତ୍ମିକ ଭାବନାରେ ଭରିଦେଇଥିଲା।
ସୂଚନାଯୋଗ୍ୟ ଯେ, ୨୦୧୩ ମସିହାରେ ସିନାପାଲିରେ ଭବ୍ୟ ଜଗନ୍ନାଥ ମନ୍ଦିର ନିର୍ମାଣ ପରେ ପୁରୀ ଗଜପତି ମହାରାଜଙ୍କ ପରାମର୍ଶକ୍ରମେ ଏଠାରେ ପ୍ରତିବର୍ଷ ଶ୍ରୀଜିଉଙ୍କ ସୁନାବେଶ ସମେତ ପୁରୀ ଶ୍ରୀମନ୍ଦିରର ପ୍ରାୟ ସମସ୍ତ ରୀତିନୀତି ପାଳନ କରାଯାଉଛି। ଏହା ସିନାପାଲିକୁ ପଶ୍ଚିମ ଓଡ଼ିଶାର ଏକ ପ୍ରମୁଖ ଆଧ୍ୟାତ୍ମିକ କେନ୍ଦ୍ର ଭାବେ ପରିଚିତ କରାଇଛି।