ଯକ୍ଷ୍ମା ମୁକ୍ତ ଅଭିଯାନରେ ନୂଆପଡ଼ାର ବଡ଼ ପଦକ୍ଷେପ : ରୋଗୀଙ୍କ ସହ ପରିବାରକୁ ମିଳିବ ପୁଷ୍ଟିକର ଖାଦ୍ୟ।

ନୂଆପଡ଼ା – ୩୦/୪- ଯକ୍ଷ୍ମା ମୁକ୍ତ ଭାରତ ଅଭିଯାନରେ ନୂଆପଡ଼ା ଜିଲ୍ଲା ଆଜି ଏକ ନୂତନ ମାଇଲଖୁଣ୍ଟ ସ୍ଥାପନ କରିଛି। ଜିଲ୍ଲା ପ୍ରଶାସନ ଏବଂ ଆର.କେ. ଏଚ.ଆଇ.ଭି ଏଡସ୍ ରିସର୍ଚ୍ଚ ଆଣ୍ଡ କେୟାର ସେଣ୍ଟରର ମିଳିତ ପ୍ରୟାସରେ କୋମନା ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ର ପରିସରରେ ଯକ୍ଷ୍ମା ରୋଗୀମାନଙ୍କ ପାଇଁ ଏକ ସ୍ୱତନ୍ତ୍ର ପୁଷ୍ଟିକର ଖାଦ୍ୟ ସାମଗ୍ରୀ ବଣ୍ଟନ କାର୍ଯ୍ୟକ୍ରମ ଶୁଭାରମ୍ଭ ହୋଇଯାଇଛି।
ନୂଆପଡ଼ାର ଅନନ୍ୟ ପ୍ରୟାସ : ସାରା ଦେଶରେ ପ୍ରଥମ ।
ଉଲ୍ଲେଖନୀୟ ବିଷୟ ହେଉଛି, ନୂଆପଡ଼ା ଦେଶର ପ୍ରଥମ ଜିଲ୍ଲା ଭାବେ ପରିଚିତ ହୋଇଛି, ଯେଉଁଠାରେ କେବଳ ଯକ୍ଷ୍ମା ରୋଗୀ ନୁହଁନ୍ତି ବରଂ ସେମାନଙ୍କ ପରିବାର ର ଅନ୍ୟ ୩ ଜଣ ସଦସ୍ୟଙ୍କୁ ମଧ୍ୟ ପୁଷ୍ଟିକର କିଟ୍ ଯୋଗାଇ ଦିଆଯାଉଛି। ଜିଲ୍ଲାର ମୋଟ ୩୨୦୦ ଯକ୍ଷ୍ମା ରୋଗୀ ଏହି ଯୋଜନାରେ ଉପକୃତ ହେବେ।
ଜିଲ୍ଲାପାଳ ମଧୁସୂଦନ ଦାଶ ମୁଖ୍ୟ ଅତିଥି ଭାବେ ଯୋଗଦେଇ ପ୍ରଥମ ପର୍ଯ୍ୟାୟରେ ୧୨୫ ଜଣ ରୋଗୀ ଓ ସେମାନଙ୍କ ପରିବାରକୁ ମିଶାଇ ମୋଟ ୫୦୦ଟି କିଟ୍ ବଣ୍ଟନ କରିଥିଲେ।
କିଟ୍‌ ରେ କ’ଣ ଅଛି ? ରୋଗୀ ଙ୍କ ସ୍ୱାସ୍ଥ୍ୟାବସ୍ଥାରେ ଶୀଘ୍ର ସୁଧାର ଆଣିବା ପାଇଁ ଏଥିରେ ଚାଉଳ, ଡାଲି, ବୁଟ ଡାଲି, ଘିଅ ଏବଂ ଖଜୁରୀ ଭଳି ଉଚ୍ଚ ପ୍ରୋଟିନ୍ ଯୁକ୍ତ ସାମଗ୍ରୀ ରହିଛି।
ସରକାରଙ୍କ ପକ୍ଷରୁ ଡିବିଟି ମାଧ୍ୟମରେ ରୋଗୀଙ୍କୁ ମାସିକ ୧୦୦୦ ଟଙ୍କାର ସହାୟତା ପ୍ରଦାନ କରାଯାଉଥିବା ବେଳେ, ଏହି ଅତିରିକ୍ତ ଖାଦ୍ୟ କିଟ୍ ସେମାନଙ୍କ ରୋଗ ପ୍ରତିରୋଧକ ଶକ୍ତି ବୃଦ୍ଧିରେ ସହାୟକ ହେବ।
ଜିଲ୍ଲା ପାଇଁ ବଡ଼ ଘୋଷଣା : ଏମଆରଆଇ (MRI) ସେବା ଓ ମେଗା କ୍ୟାମ୍ପ ।
କାର୍ଯ୍ୟକ୍ରମ ଅବସରରେ ସଂସ୍ଥାର ଅଧ୍ୟକ୍ଷ ଡା. ଧର୍ମେନ୍ଦ୍ର କୁମାର ଜିଲ୍ଲା ମୁଖ୍ୟ ଚିକିତ୍ସାଳୟରେ MCL-CSR ପାଣ୍ଠିରୁ ଏମଆରଆଇ (MRI) ମେସିନ ସ୍ଥାପନ ପାଇଁ ପ୍ରସ୍ତାବ ଦେଇଥିଲେ, ଯାହାକୁ ଜିଲ୍ଲାପାଳ ତତକ୍ଷଣାତ ଅନୁମୋଦନ କରିଛନ୍ତି। ଏହାସହ ଆଗାମୀ ଦିନରେ ଦୂରଦୂରାନ୍ତର ଲୋକଙ୍କ ପାଇଁ ଏକ ‘ମେଗା ମେଡିକାଲ କ୍ୟାମ୍ପ’ ଆୟୋଜନ କରାଯିବ ବୋଲି ସୂଚନା ମିଳିଛି। “ଏହି ପ୍ରୟାସ ଦ୍ୱାରା ନୂଆପଡ଼ାର ଗରିବ ରୋଗୀମାନେ ଅତ୍ୟାଧୁନିକ ଚିକିତ୍ସା ପାଇବା ସହ ବାହାରକୁ ଯାଇ ଅଯଥା ଖର୍ଚ୍ଚାନ୍ତ ହେବାରୁ ରକ୍ଷା ପାଇପାରିବେ।” – ଜିଲ୍ଲା ପ୍ରଶାସନ।
ଏହି କାର୍ଯ୍ୟକ୍ରମରେ ମୁଖ୍ୟ ଜିଲ୍ଲା ଚିକିତ୍ସା ଅଧିକାରୀ ଡା. ଦ୍ୱାରିକାନାଥ ଶତପଥୀ, ଡିଟିଓ ଡା. ଦିଲୀପ ଦାସ, ଡିପିଏମ ସତ୍ୟନାରାୟଣ ତ୍ରିପାଠୀ, ବିଏମଓ ଡା. ପ୍ରଦୀପ କନ୍ହାରଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ। ପ୍ରକଳ୍ପ ମୁଖ୍ୟ ଯୋଗିତା ବୋରକର ଓ ତାଙ୍କ ଟିମ୍ ଏହାର ସଫଳ ପରିଚାଳନା କରିଥିଲେ।