ନୂଆପଡ଼ା ପୋଲିସର ବଡ଼ ସଫଳତା : ‘ଅନ୍ୱେଷଣ-୩’ ଅଭିଯାନରେ ୪୧ ନିଖୋଜ ମହିଳା ଓ ଶିଶୁଙ୍କୁ ଉଦ୍ଧାର।

ନୂଆପଡ଼ା – ୨୫/୭-  ଓଡ଼ିଶା ପୋଲିସର ସ୍ୱତନ୍ତ୍ର ‘ଅନ୍ୱେଷଣ-୩’ ଅଭିଯାନ ଅନ୍ତର୍ଗତ ନୂଆପଡ଼ା ପୋଲିସ ଏକ ଉଲ୍ଲେଖନୀୟ ସଫଳତା ହାସଲ କରିଛି। ମାତ୍ର ତିନି ଦିନ ମଧ୍ୟରେ ୪୧ ଜଣ ନିଖୋଜ ମହିଳା ଓ ଶିଶୁଙ୍କୁ ସୁରକ୍ଷିତ ଭାବେ ଉଦ୍ଧାର କରି ସେମାନଙ୍କ ପରିବାର ସହ ପୁନର୍ମିଳନ କରାଯାଇଛି।
ଉଦ୍ଧାର ପାଇଥିବାଙ୍କ ମଧ୍ୟରେ ୮ ଜଣ ନାବାଳିକା ଓ ୩୩ ଜଣ ମହିଳା ରହିଛନ୍ତି। ଏହି ସଫଳତା ନୂଆପଡ଼ା ପୋଲିସର ତତ୍ପରତା, ପେଶାଦାର କାର୍ଯ୍ୟଦକ୍ଷତା ଏବଂ ମାନବିକ ଦୃଷ୍ଟିଭଙ୍ଗୀର ପରିଚୟ ଦେଇଛି।
ବିଶେଷକରି କୋମନା ଥାନା ପୋଲିସ ଦୁଇଟି ନିଖୋଜ ନାବାଳିକା ମାମଲାରେ ଅଭିଯୋଗ ପାଇବାର ୨୪ ଘଣ୍ଟା ମଧ୍ୟରେ ସଫଳତାର ସହ ଖୋଜି ବାହାର କରି ସେମାନଙ୍କୁ ସୁରକ୍ଷିତ ଭାବେ ପରିବାରଙ୍କୁ ହସ୍ତାନ୍ତର କରିଛି।
ଏହି ଅଭିଯାନରେ ନୂଆପଡ଼ା ପୋଲିସ ଓଡ଼ିଶା ବାହାରେ ମଧ୍ୟ ବ୍ୟାପକ ତଲାସି ଚଳାଇ ଆନ୍ଧ୍ରପ୍ରଦେଶର ତିରୁପତି ଏବଂ ତେଲେଙ୍ଗାନାର ସିକନ୍ଦରାବାଦ ଭଳି ସ୍ଥାନରୁ ନିଖୋଜ ବ୍ୟକ୍ତିଙ୍କୁ ଠାବ କରିବାରେ ସଫଳ ହୋଇଛି। ଏହା ଆନ୍ତଃରାଜ୍ୟ ସମନ୍ୱୟ ଓ ଦକ୍ଷ ପୋଲିସିଂ ର ଏକ ଉତ୍କୃଷ୍ଟ ଉଦାହରଣ।ଏହି ସଫଳତା ପାଇଁ ନୂଆପଡ଼ା ପୋଲିସର ସମସ୍ତ ଅଧିକାରୀ ଓ କର୍ମଚାରୀଙ୍କୁ ସାଧାରଣ ମହଳରୁ ପ୍ରଶଂସା କରାଯାଉଛି।