କୋମନା ବ୍ଲକର ଠିକପାଲି କ୍ଲଷ୍ଟରରେ ଶିଶୁ ସୁରଭି ମହୋତ୍ସବ: ସାଂସ୍କୃତିକ ପ୍ରତିଯୋଗିତାରେ ଶୁକ୍ଳିମୁଣ୍ଡି ବିଦ୍ୟାଳୟ ପ୍ରଥମ।

ନୂଆପଡ଼ା -୧୦/୧୦- ଶିଶୁମାନଙ୍କ ଅନ୍ତର୍ନିହିତ ପ୍ରତିଭାର ବିକାଶ, ସୃଜନଶୀଳତାର ପ୍ରସ୍ଫୁଟନ ଏବଂ କଳା-ସଂସ୍କୃତି ପ୍ରତି ଆଗ୍ରହ ବୃଦ୍ଧି ଲକ୍ଷ୍ୟରେ ନୂଆପଡ଼ା ଜିଲ୍ଲାର କୋମନା ବ୍ଲକ ଅନ୍ତର୍ଗତ ଠିକପାଳି କ୍ଲଷ୍ଟରରେ କ୍ଲଷ୍ଟରସ୍ତରୀୟ ଶିଶୁ ସୁରଭି ମହୋତ୍ସବ ଉତ୍ସାହ ଓ ଉଦ୍ଦୀପନାର ସହ ପାଳିତ ହୋଇଯାଇଛି।
ଠିକପାଳି ସିଆରସିସି ଦିଲିପ କୁମାର ଶବରଙ୍କ ସଭାପତିତ୍ୱରେ ଆୟୋଜିତ ଏହି ମହୋତ୍ସବରେ ଇନ୍ଦ୍ରମଣି ପାଣିଗ୍ରାହୀ ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ଇଶାକ ମହମ୍ମଦ, ଅଲସିଂ ବରିହା, ମନବୋଧ ଦାସ, ଗୋଦ୍ରୋ ବରିହା, ଭୁବନେଶ୍ୱର ଶବର, କୁନୁ ବାଗ, ଅଭୟ ରଞ୍ଜନ ପାଢ଼ୀ, ଭୀମସେନ ଶବର ଏବଂ ଲଖନା ସିଆରସିସି ସହଦେବ ମହାନନ୍ଦ ସମ୍ମାନିତ ଅତିଥି ଭାବେ ଯୋଗଦେଇଥିଲେ।
୧୨ଟି ବିଦ୍ୟାଳୟର ଛାତ୍ରଛାତ୍ରୀଙ୍କ ମଧ୍ୟରେ ପ୍ରତିଭାର ପ୍ରତିଯୋଗିତା
ଏହି ମହୋତ୍ସବରେ କ୍ଲଷ୍ଟର ଅନ୍ତର୍ଗତ ୧୨ଟି ବିଦ୍ୟାଳୟର ଛାତ୍ରଛାତ୍ରୀ ଭାଗ ନେଇ ବିଭିନ୍ନ ପ୍ରତିଯୋଗିତାରେ ନିଜ ନିଜର ପ୍ରତିଭା ପ୍ରଦର୍ଶନ କରିଥିଲେ। ପାଠପଢ଼ା ସହିତ ସାଂସ୍କୃତିକ ଓ ସୃଜନଶୀଳ କାର୍ଯ୍ୟକଳାପରେ ଶିଶୁମାନଙ୍କ ଦକ୍ଷତାକୁ ମଞ୍ଚ ଯୋଗାଇଦେବା ଏହି କାର୍ଯ୍ୟକ୍ରମର ମୁଖ୍ୟ ଆକର୍ଷଣ ଥିଲା।
କାର୍ଯ୍ୟକ୍ରମର ଶେଷ ପର୍ଯ୍ୟାୟରେ ବିଦ୍ୟାଳୟଗୁଡ଼ିକ ମଧ୍ୟରେ ସାଂସ୍କୃତିକ ପ୍ରତିଯୋଗିତା ଆୟୋଜିତ ହୋଇଥିଲା। ଏଥିରେ ସ.ଉ.ପ୍ରା. ବିଦ୍ୟାଳୟ, ଶୁକ୍ଳିମୁଣ୍ଡି ପ୍ରଥମ ସ୍ଥାନ ହାସଲ କରିଥିବା ବେଳେ ପିଏମ୍‌ଶ୍ରୀ ବିଦ୍ୟାଳୟ, ମେଣ୍ଢାଟାଳ ଦ୍ୱିତୀୟ ଏବଂ ସ.ଉ.ପ୍ରା. ବିଦ୍ୟାଳୟ, ଠିକପାଳି ତୃତୀୟ ସ୍ଥାନ ଅଧିକାର କରିଥିଲା।
କୃତୀ ଛାତ୍ରଛାତ୍ରୀ ଓ ବିଦ୍ୟାଳୟଗୁଡ଼ିକୁ ଟ୍ରଫି ସହ ପ୍ରମାଣପତ୍ର ପ୍ରଦାନ କରି ଉତ୍ସାହିତ କରାଯାଇଥିଲା। ଏଥିସହ ପ୍ରତ୍ୟେକ ପ୍ରତିଯୋଗିତାରେ ପ୍ରଥମ ସ୍ଥାନ ହାସଲ କରିଥିବା ଛାତ୍ରଛାତ୍ରୀ ବ୍ଲକସ୍ତରୀୟ ଶିଶୁ ସୁରଭି କାର୍ଯ୍ୟକ୍ରମରେ ଭାଗ ନେବାର ସୁଯୋଗ ପାଇବେ।
ଶିକ୍ଷକ-ଶିକ୍ଷୟିତ୍ରୀଙ୍କ ସହଯୋଗରେ ସଫଳ ଆୟୋଜନ
ମହୋତ୍ସବର ମଞ୍ଚ ପରିଚାଳନା ଜୟଦେବ ପ୍ରଧାନ କରିଥିବା ବେଳେ ଶୋଭାକର ପ୍ରଧାନ ଧନ୍ୟବାଦ ଅର୍ପଣ କରିଥିଲେ। କାର୍ଯ୍ୟକ୍ରମର ତଦାରଖ ଦାୟିତ୍ୱରେ ମନୋହର ସୁନାନୀ, ନରେନ୍ଦ୍ର କୁମାର ଯୋଷୀ, ଚୈତୁ ତାଣ୍ଡୀ, ଅଭିଳାଷ ଶବର ଓ ବିଶ୍ୱନାଥ ସାହୁ ରହିଥିଲେ।
କ୍ଲଷ୍ଟରର ସମସ୍ତ ଶିକ୍ଷକ-ଶିକ୍ଷୟିତ୍ରୀଙ୍କ ସକ୍ରିୟ ସହଯୋଗରେ ମହୋତ୍ସବଟି ସଫଳତାର ସହ ସମ୍ପନ୍ନ ହୋଇଥିଲା।