ଖଡ଼ିଆଳ କୋର୍ଟ ରେ ନବ ନିଯୁକ୍ତ ସିଜେଏମ୍ ସୁଶାନ୍ତ କୁମାର ମିଶ୍ରଙ୍କୁ ଭବ୍ୟ ସମ୍ବର୍ଦ୍ଧନା।

ନୂଆପଡ଼ା -୨୭/୭- ନୂଆପଡ଼ା ଜିଲ୍ଲାର ନବନିଯୁକ୍ତ ମୁଖ୍ୟ ନ୍ୟାୟିକ ଦଣ୍ଡାଧିକାରୀ (ସିଜେଏମ୍) ସୁଶାନ୍ତ କୁମାର ମିଶ୍ରଙ୍କ ଖଡ଼ିଆଳ କୋର୍ଟକୁ ପ୍ରଥମ ଗସ୍ତ ଅବସରରେ ଖଡ଼ିଆଳ ଯୁଡିସିଆଲ ବାର ଆସୋସିଏସନ ପକ୍ଷରୁ ଏକ ଗରିମାମୟ ସମ୍ବର୍ଦ୍ଧନା ସଭାର ଆୟୋଜନ କରାଯାଇଥିଲା। ବାର ହଲ୍‌ରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ପୁଷ୍ପଗୁଚ୍ଛ ଓ ଉତ୍ତରୀୟ ପ୍ରଦାନ କରି ନବନିଯୁକ୍ତ ସିଜେଏମ୍‌ଙ୍କୁ ଭବ୍ୟ ସ୍ୱାଗତ ସମ୍ବର୍ଦ୍ଧନା ପ୍ରଦାନ୍ କରାଯାଇଥିଲା।
ବାର ଆସୋସିଏସନ ର ସଭାପତି ଗିରିଧାରୀ ବିଭାର ଙ୍କ ସଭାପତିତ୍ୱ ରେ ଅନୁଷ୍ଠିତ ସଭାରେ ଜିଲ୍ଲା ର ନ୍ୟାୟ ବ୍ୟବସ୍ଥାକୁ ଅଧିକ ଗତିଶୀଳ, ସ୍ୱଚ୍ଛ ଓ ଜନମୁଖୀ କରିବା ପାଇଁ ନ୍ୟାୟପାଳିକା ଏବଂ ଆଇନଜୀବୀମାନଙ୍କ ମଧ୍ୟରେ ସୁଦୃଢ଼ ସମନ୍ୱୟ ଓ ପାରସ୍ପରିକ ସହଯୋଗ ର ଆବଶ୍ୟକତା ଉପରେ ବକ୍ତାମାନେ ଗୁରୁତ୍ୱାରୋପ କରିଥିଲେ। ସାଧାରଣ ଲୋକଙ୍କୁ ସମୟୋପଯୋଗୀ, ନିରପେକ୍ଷ ଓ ସୁଲଭ ନ୍ୟାୟ ପ୍ରଦାନ କରିବା ହିଁ ନ୍ୟାୟ ବ୍ୟବସ୍ଥାର ମୂଳ ଲକ୍ଷ୍ୟ ବୋଲି ମଧ୍ୟ ମତ ପ୍ରକାଶ ପାଇଥିଲା।
ନିଜ ଅଭିଭାଷଣରେ ସିଜେଏମ୍ ସୁଶାନ୍ତ କୁମାର ମିଶ୍ର ଖଡ଼ିଆଳ ବାର ଏସୋସିଏସନ ପକ୍ଷରୁ ମିଳିଥିବା ଆନ୍ତରିକ ସମ୍ବର୍ଦ୍ଧନା ପାଇଁ କୃତଜ୍ଞତା ଜଣାଇ କହିଥିଲେ ଯେ, ନ୍ୟାୟପାଳିକା ଓ ଆଇନଜୀବୀ ମାନଙ୍କ ମଧ୍ୟରେ ସୁସମ୍ପର୍କ ଓ ସମନ୍ୱୟ ରହିଲେ ନ୍ୟାୟ ପ୍ରଦାନ ପ୍ରକ୍ରିୟା ଆହୁରି ସୁଚାରୁ ଓ ଫଳପ୍ରଦ ହୋଇପାରିବ। ଆଇନ ର ଶାସନ କୁ ସୁଦୃଢ଼ କରିବା ସହ ସାଧାରଣ ଲୋକଙ୍କ ନ୍ୟାୟ ପ୍ରତି ବିଶ୍ୱାସ କୁ ଅକ୍ଷୁଣ୍ଣ ରଖିବା ଦିଗରେ ସେ ସର୍ବଦା ନିଷ୍ଠାର ସହ କାର୍ଯ୍ୟ କରିବେ ବୋଲି ପ୍ରକାଶ କରିଥିଲେ।
ଏହି ସମ୍ବର୍ଦ୍ଧନା ସଭାରେ ବରିଷ୍ଠ ଆଇନଜୀବୀ ସାରଦା ଚନ୍ଦ୍ର ପଣ୍ଡା, ଶିବ ପ୍ରସାଦ ମେହେର, ଭବେଶ ପାଣିଗ୍ରାହୀ, ଯୁଧିଷ୍ଟିର ମେହର୍, ଚିତ୍ତରଞ୍ଜନ ସିଂଦେଓ, ସଞ୍ଜୟ କୁମାର ମହାଉତି, ସୁଶାନ୍ତ ତାଣ୍ଡି, ପୂର୍ଣ୍ଣଚନ୍ଦ୍ର ମେହେର, ବାଞ୍ଛାନିଧି ବେହେରା, ଆଦିତ୍ୟ ନାରାୟଣ ମହାପାତ୍ରଙ୍କ ସମେତ ବାର ର କୋଷାଧ୍ୟକ୍ଷ ଜୟପ୍ରକାଶ ପଣ୍ଡା, ଟିକେଶ୍ୱର ବେହେରା, ଶାମ୍ବ କୁମାର ସରାଫ, ତୁଷାରକାନ୍ତ ମେହେର, କେତନ ବେହେରା ଓ ବହୁ ଆଇନଜୀବୀ ଉପସ୍ଥିତ ରହି ନବନିଯୁକ୍ତ ସିଜେଏମ୍‌ଙ୍କୁ ଶୁଭେଚ୍ଛା ଓ ଅଭିନନ୍ଦନ ଜଣାଇଥିଲେ।
କାର୍ଯ୍ୟକ୍ରମ ଶେଷରେ ଯୁଡିସିଆଲ ବାର ଆସୋସିଏସନର ସମ୍ପାଦକ ମନୋରଞ୍ଜନ ରାଉତ ଧନ୍ୟବାଦ ଅର୍ପଣ କରିଥିଲେ। ସୌହାର୍ଦ୍ୟ, ଗରିମା ଓ ଆନ୍ତରିକତାର ପରିବେଶ ମଧ୍ୟରେ ସଫଳତାର ସହ ସମାପ୍ତ ହୋଇଥିବା ଏହି ସମ୍ବର୍ଦ୍ଧନା ସଭା ଖଡ଼ିଆଳ ବାର ଓ ନ୍ୟାୟପାଳିକା ମଧ୍ୟରେ ପାରସ୍ପରିକ ସହଯୋଗ ଏବଂ ସୁସମ୍ପର୍କକୁ ଆହୁରି ସୁଦୃଢ଼ କରିବ ବୋଲି ଉପସ୍ଥିତ ସମସ୍ତେ ଆଶା ପ୍ରକାଶ କରିଥିଲେ। (ପ୍ରଥମ ଫଟୋ -AI)