ଖରିଆର ରୋଡ୍‌ରେ ସହରାଞ୍ଚଳ ଜନ ସମ୍ପର୍କ ଓ ନାଗରିକ ଭାଗିଦାରୀ କାର୍ଯ୍ୟକ୍ରମ ଅନୁଷ୍ଠିତ: ହିତାଧିକାରୀଙ୍କୁ ବଣ୍ଟାଗଲା ଖାଉଟି କାର୍ଡ।

ନୂଆପଡ଼ା, ୧୮/୬- ବିଜ୍ଞାପିତ ଅଞ୍ଚଳ ପରିଷଦ (ଏନଏସି), ଖରିଆର ରୋଡ ଆନୁକୂଲ୍ୟରେ ୱାର୍ଡ ନଂ ୧୬ ଏବଂ ୧୭ ଠାରେ ଏକ ବୃହତ୍ ସହରାଞ୍ଚଳ ଜନ ସମ୍ପର୍କ ଏବଂ ନାଗରିକ ଭାଗିଦାରୀ କାର୍ଯ୍ୟକ୍ରମ ସଫଳତାର ସହ ଅନୁଷ୍ଠିତ ହୋଇଯାଇଛି। ସହରର ବିକାଶ ପ୍ରକ୍ରିୟାରେ ନାଗରିକମାନଙ୍କୁ ସିଧାସଳଖ ସାମିଲ କରିବା ଏବଂ ସରକାରୀ ଯୋଜନାର ସୁଫଳ ପ୍ରତ୍ୟେକ ବ୍ୟକ୍ତିଙ୍କ ପାଖରେ ପହଞ୍ଚାଇବା ଉଦ୍ଦେଶ୍ୟରେ ଏହି ଜନକଲ୍ୟାଣକାରୀ ଶିବିରର ଆୟୋଜନ କରାଯାଇଥିଲା।
ଏହି ବିଶେଷ କାର୍ଯ୍ୟକ୍ରମରେ ଖରିଆର ରୋଡ ପରିଷଦର ସମ୍ମାନିତ ଅଧ୍ୟକ୍ଷା ଡ଼ଃ ସୋନିଆ ଅଗ୍ରୱାଲ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଉପାଧ୍ୟକ୍ଷ ନିଶାନ୍ତ ଡାଗା ଏବଂ ପରିଷଦର ସମସ୍ତ ସଭ୍ୟ ଓ ସଭ୍ୟା (କାଉନସିଲର) ସମ୍ମାନିତ ଅତିଥି ଭାବେ ଉପସ୍ଥିତ ଥିଲେ। ଏହି ଅବସରରେ ଉଭୟ ୱାର୍ଡରୁ ବହୁ ସଂଖ୍ୟାରେ ସ୍ଥାନୀୟ ଜନସାଧାରଣ ଓ ମହିଳାମାନେ ସ୍ୱତଃସ୍ଫୂର୍ତ୍ତ ଭାବେ ଯୋଗଦେଇ କାର୍ଯ୍ୟକ୍ରମକୁ ସଫଳ କରିଥିଲେ।
ଏହି ଅଭିଯାନର ମୂଳ ଲକ୍ଷ୍ୟ ହେଉଛି ଜନସାଧାରଣଙ୍କ ସହ ସରକାରଙ୍କ ସିଧାସଳଖ ସମ୍ପର୍କକୁ ଆହୁରି ସୁଦୃଢ଼ କରିବା। ଏହା ବ୍ୟତୀତ
ନାଗରିକ ସହଭାଗିତା ତଥା ପ୍ରଶାସନିକ କାର୍ଯ୍ୟରେ ସ୍ଥାନୀୟ ଲୋକ ଙ୍କ ସକ୍ରିୟ ଅଂଶଗ୍ରହଣକୁ ପ୍ରୋତ୍ସାହିତ କରିବା।
କେନ୍ଦ୍ର ଓ ରାଜ୍ୟ ସରକାରଙ୍କ ବିଭିନ୍ନ ଜନକଲ୍ୟାଣକାରୀ ଯୋଜନା ଏବଂ ଚାଲୁ ରହିଥିବା ବିକାଶମୂଳକ କାର୍ଯ୍ୟକ୍ରମ ସମ୍ପର୍କରେ ଲୋକଙ୍କୁ ଅବଗତ କରାଇବା।
ସାଧାରଣ ଜନତାଙ୍କ ଆଶା, ଆକାଂକ୍ଷା ଏବଂ ମତାମତକୁ ଶାସନ ଓ ବିକାଶ ପ୍ରକ୍ରିୟା ସହ ଯୋଡ଼ିବା।
ସରକାରଙ୍କ ସଫଳତା ପୁସ୍ତିକା ଓ ଖାଉଟି କାର୍ଡ ବଣ୍ଟନ।
କାର୍ଯ୍ୟକ୍ରମ ଚାଲିଥିବା ସମୟରେ ଏକ ସ୍ୱତନ୍ତ୍ର ସେସନରେ ଯୋଗ୍ୟ ହିତାଧିକାରୀମାନଙ୍କୁ “ମୁଖ୍ୟମନ୍ତ୍ରୀ ଅନ୍ନପୂର୍ଣ୍ଣା ଯୋଜନା” ଅଧୀନରେ ନୂତନ ଖାଉଟୀ କାର୍ଡ ପ୍ରଦାନ କରାଯାଇଥିଲା। ଏହା ସହିତ ସରକାରଙ୍କ ଦୁଇ ବର୍ଷ ପୂର୍ତ୍ତୀ ଅବସରରେ ହାସଲ ହୋଇଥିବା ପ୍ରମୁଖ ସଫଳତାର ବାର୍ତ୍ତା ସମ୍ବଳିତ ସ୍ୱତନ୍ତ୍ର ପୁସ୍ତିକା “ବିକାଶର ଧାରା ଓଡ଼ିଶା ସାରା” ଉପସ୍ଥିତ ସମସ୍ତ ଜନସାଧାରଣଙ୍କ ମଧ୍ୟରେ ବଣ୍ଟନ କରାଯାଇଥିଲା, ଯାହାଦ୍ୱାରା ଲୋକେ ସରକାରଙ୍କ ପ୍ରଗତି ସମ୍ପର୍କରେ ସବିଶେଷ ସୂଚନା ପାଇପାରିବେ।
ଅଧ୍ୟକ୍ଷାଙ୍କ ବାର୍ତ୍ତା:- “ଜନସାଧାରଣଙ୍କ ସହଭାଗିତା ବିନା ସହରର ବିକାଶ ଅସମ୍ଭବ। ସରକାରଙ୍କ ପ୍ରତିଟି ଯୋଜନା ଯେପରି ଶେଷ ହିତାଧିକାରୀଙ୍କ ପାଖରେ ସ୍ୱଚ୍ଛତାର ସହ ପହଞ୍ଚିବ, ତାହା ଆମର ପ୍ରାଥମିକତା।”
ପରିଶେଷରେ ଉପସ୍ଥିତ ସ୍ଥାନୀୟ ବାସିନ୍ଦାମାନେ ନିଜ ନିଜ ଅଞ୍ଚଳର ବିଭିନ୍ନ ସମସ୍ୟା ଓ ବିକାଶମୂଳକ ପ୍ରସ୍ତାବ ଅତିଥିମାନଙ୍କ ସମ୍ମୁଖରେ ରଖିଥିଲେ ଏବଂ ପ୍ରଶାସନ ତରଫରୁ ଏହାର ତ୍ୱରିତ ସମାଧାନ ପାଇଁ ପ୍ରତିଶ୍ରୁତି ଦିଆଯାଇଥିଲା। ଅଞ୍ଚଳବାସୀ ଏଭଳି ପ୍ରଶଂସନୀୟ ଜନସମ୍ପର୍କ ଅଭିଯାନ ପାଇଁ ଖରିଆର ରୋଡ୍ ଏନଏସି କର୍ତ୍ତୃପକ୍ଷଙ୍କୁ ସାଧୁବାଦ ଜଣାଇଛନ୍ତି।