ସ୍ବେଚ୍ଛାସେବୀ ଅନୁଷ୍ଠାନ CPSW ପକ୍ଷରୁ ୮୦ତମ ସ୍ୱାଧୀନତା ଦିବସ ପାଳିତ : ଦେଶ ହିତକର କାର୍ଯ୍ୟ ସହ ପ୍ଲାଷ୍ଟିକ ମୁକ୍ତ ପରିବେଶ ପାଇଁ ଆହ୍ୱାନ।

ନୂଆପଡ଼ା -୧୫/୮- ନୂଆପଡ଼ା ଜିଲ୍ଲା କୋମନା ବ୍ଲକ ଅନ୍ତର୍ଗତ କେନ୍ଦୁଭଟାସ୍ଥିତ ସ୍ୱେଚ୍ଛାସେବୀ ସଂସ୍ଥା CPSW କାର୍ଯ୍ୟାଳୟ ପରିସରରେ ଦେଶପ୍ରେମ ଓ ଉତ୍ସାହର ସହ ୮୦ତମ ସ୍ୱାଧୀନତା ଦିବସ ପାଳିତ ହୋଇଯାଇଛି।
ଏହି ଅବସରରେ ସଂସ୍ଥାର ମୁଖ୍ୟ କାର୍ଯ୍ୟନିର୍ବାହୀ ପ୍ରମୁଖ ବିରଞ୍ଚି ନାରାୟଣ ମହାପାତ୍ର ଜାତୀୟ ପତାକା ଉତ୍ତୋଳନ କରିଥିଲେ। ମୁଖ୍ୟ ଅତିଥି ଭାବେ ଠିକପାଲି ପଞ୍ଚାୟତର ପୂର୍ବତନ ସରପଞ୍ଚ  ବୃନ୍ଦାବନ ଶବର ଯୋଗଦେଇଥିବା ବେଳେ ସଂଗଠନର ସମସ୍ତ କର୍ମୀ ଓ ସଦସ୍ୟ ଉପସ୍ଥିତ ଥିଲେ।
ପତାକା ଉତ୍ତୋଳନ ପରେ ଶ୍ରୀ ବିରଞ୍ଚି ନାରାୟଣ ମହାପାତ୍ର ନିଜ ଉଦ୍‌ବୋଧନରେ ଦେଶର ସ୍ୱାଧୀନତା ପାଇଁ ଇଂରେଜ ଶାସକଙ୍କ ବିରୋଧରେ ସଂଗ୍ରାମ କରିଥିବା ସ୍ୱାଧୀନତା ସଂଗ୍ରାମୀଙ୍କ ତ୍ୟାଗ, ସଂଘର୍ଷ ଓ ବୀରତ୍ୱର ସ୍ମୃତିଚାରଣ କରିଥିଲେ। ସେମାନଙ୍କ ତ୍ୟାଗକୁ ସ୍ମରଣ କରି ଦେଶର ଉନ୍ନତି ଓ ସୁଦୃଢ଼ ରାଷ୍ଟ୍ର ଗଠନ ପାଇଁ ପ୍ରତ୍ୟେକେ ନିଜ ନିଜ ସ୍ତରରେ ଦେଶହିତକର କାର୍ଯ୍ୟ କରିବାକୁ ସେ ଆହ୍ୱାନ ଦେଇଥିଲେ।
ଏଥିସହ ପରିବେଶ ସୁରକ୍ଷାକୁ ମଧ୍ୟ ଦେଶ ଗଠନର ଏକ ଅବିଚ୍ଛେଦ୍ୟ ଅଂଶ ଭାବେ ଗ୍ରହଣ କରିବାକୁ ସେ ଅନୁରୋଧ କରିଥିଲେ। ପ୍ଲାଷ୍ଟିକ ଓ ପଲିଥିନର ବ୍ୟବହାର ହ୍ରାସ କରି ପରିବେଶକୁ ସ୍ୱଚ୍ଛ ଓ ସୁରକ୍ଷିତ ରଖିବା ପାଇଁ ସମସ୍ତଙ୍କୁ ସଚେତନ ହେବାକୁ ସେ ପରାମର୍ଶ ଦେଇଥିଲେ।
ଦେଶପ୍ରେମ, ସାମାଜିକ ଦାୟିତ୍ୱ ଓ ପରିବେଶ ସୁରକ୍ଷାର ବାର୍ତ୍ତା ସହ କୋମନାରେ ଅନୁଷ୍ଠିତ ଏହି ସ୍ୱାଧୀନତା ଦିବସ ପାଳନ ଅର୍ଥପୂର୍ଣ୍ଣ ହୋଇଥିଲା।