ଧରିତ୍ରୀ ରକ୍ଷା ପାଇଁ ନୂଆପଡ଼ା ରେ ମହାସଂକଳ୍ପ : ସାଇକେଲ ଶୋଭାଯାତ୍ରା ସହ ୮୭ କେଜି ପ୍ଲାଷ୍ଟିକ ବର୍ଜ୍ୟବସ୍ତୁ ସଫା।

ନୂଆପଡ଼ା -୫/୦୬- ଓଡ଼ିଶା ସରକାରଙ୍କ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗର ଆନୁକୂଳ୍ୟ ଏବଂ ନୂଆପଡ଼ା ଜିଲ୍ଲା ପ୍ରଶାସନର ସହଯୋଗରେ ବିଶ୍ୱ ପରିବେଶ ଦିବସ ଅତ୍ୟନ୍ତ ଉତ୍ସାହ ଓ ଉଦ୍ଦୀପନାର ସହ ପାଳିତ ହୋଇଯାଇଛି। ଚଳିତ ବର୍ଷର ମୂଳ ମନ୍ତ୍ର ଥିଲା “ପ୍ରକୃତି ପାଇଁ, ଜଳବାୟୁ ପାଇଁ, ଆମ ଭବିଷ୍ୟତ ପାଇଁ”।
ବିଶାଳ ସାଇକେଲ ଶୋଭ ଯାତ୍ରା ଓ ‘ଏକ ପେଡ଼ ମା’ କେ ନାମ’।
ପରିବେଶ ସଚେତନତା ସୃଷ୍ଟି କରିବା ଲକ୍ଷ୍ୟରେ ସକାଳେ କଲେକ୍ଟରେଟ ପରିସରରୁ କେନ୍ଦ୍ରୀୟ ବିଦ୍ୟାଳୟ ପର୍ଯ୍ୟନ୍ତ ଏକ ବିଶାଳ ସାଇକେଲ ଶୋଭା ଯାତ୍ରା ଆୟୋଜିତ ହୋଇଥିଲା। ଏହାପରେ କେନ୍ଦ୍ରୀୟ ବିଦ୍ୟାଳୟ ପରିସରରେ ପ୍ରଧାନମନ୍ତ୍ରୀଙ୍କ ଆହ୍ୱାନ କ୍ରମେ ‘ଏକ ପେଡ଼ ମା’ କେ ନାମ’ ଅଭିଯାନ ଅଧୀନରେ ବ୍ୟାପକ ବୃକ୍ଷରୋପଣ କରାଯାଇଥିଲା ।
କେନ୍ଦ୍ରୀୟ ବିଦ୍ୟାଳୟ ଠାରେ ଆୟୋଜିତ ଜିଲ୍ଲାସ୍ତରୀୟ ସଭାରେ ମୁଖ୍ୟ ଅତିଥି ଭାବେ ଯୋଗଦେଇ ନୂଆପଡ଼ା ବିଧାୟକ ଜୟ ଢୋଲକିଆ ବିକାଶ ସହ ପରିବେଶର ସନ୍ତୁଳନ ରକ୍ଷା ଉପରେ ଗୁରୁତ୍ୱ ଦେଇଥିଲେ। “ଉନ୍ନୟନମୂଳକ କାର୍ଯ୍ୟ ସମୟରେ ଯଥାସମ୍ଭବ ଗଛ କାଟିବା ପରିବର୍ତ୍ତେ, ଆଧୁନିକ ଜ୍ଞାନକୌଶଳ ପ୍ରୟୋଗ କରି ସେଗୁଡ଼ିକୁ ଅନ୍ୟତ୍ର ସ୍ଥାନାନ୍ତର କରି ସଂରକ୍ଷଣ କରିବା ଉପରେ ଧ୍ୟାନ ଦେବା ଆବଶ୍ୟକ।” ବୋଲି ବିଧାୟକ ଶ୍ରୀ ଢୋଲକିଆ ପ୍ରକାଶ କରିଥିଲେ।
ସଭାରେ ସଭାପତିତ୍ୱ କରି ଜିଲ୍ଲାପାଳ ମଧୁସୂଦନ ଦାଶ ପ୍ରକୃତି ସୁରକ୍ଷା କୁ ଜୀବନର ସବୁଠାରୁ ଗୁରୁତ୍ୱପୂର୍ଣ୍ଣ କର୍ତ୍ତବ୍ୟ ବୋଲି ଅଭିହିତ କରିଥିଲେ। ସେ କହିଥିଲେ ଯେ,ଜଳବାୟୁ ପରିବର୍ତ୍ତନ, ଅତ୍ୟଧିକ ଉତ୍ତାପ ଓ ବାତ୍ୟା ଭଳି ପ୍ରାକୃତିକ ବିପର୍ଯ୍ୟୟର ଏକମାତ୍ର ମୁକାବିଲା ହେଉଛି ବୃକ୍ଷରୋପଣ।
ଆସନ୍ତୁ, ସମସ୍ତେ ମିଶି ଗଛ ଲଗାଇବା,ଗଛ ବଞ୍ଚାଇବା ଏବଂ ଆଗାମୀ ପିଢ଼ି ପାଇଁ ଏକ ସୁସ୍ଥ ପୃଥିବୀ ଗଢ଼ି ତୋଳିବା।
ସଭାରେ ଜିଲ୍ଲା ଆଇନ ସେବା ପ୍ରାଧିକରଣ ର ସଚିବ ନବନୀତା ଦାଶ ପରିବେଶ ସୁରକ୍ଷା ଆଇନ, ବନ୍ୟଜନ୍ତୁ ସୁରକ୍ଷା ଆଇନ ଏବଂ କଠିନ ବର୍ଯ୍ୟବସ୍ତୁ ପରିଚାଳନା ନିୟମାବଳୀ, ୨୦୨୬ ବିଷୟରେ ଆଲୋକପାତ କରି ସମସ୍ତଙ୍କୁ ଆଇନଗତ ଭାବେ ସଚେତନ କରାଇଥିଲେ। ଏ ଅବସର ରେ ପରିବେଶ ସୁରକ୍ଷା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଚଳିତ ବର୍ଷ ବହୁ ବିଶିଷ୍ଟ ବ୍ୟକ୍ତି ଓ ସଂଗଠନକୁ ପୁରସ୍କୃତ କରାଯାଇଛି। ପରିବେଶ ସୁରକ୍ଷା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଗାୟତ୍ରୀ ପଣ୍ଡା, ଘନଶ୍ୟାମ କରୁଆଁ, ନରେଶ ମେହେର ଓ କ୍ଷୀରୋଦ ବନ୍ଧିଛୋର ଙ୍କୁ ‘ପ୍ରକୃତି ବନ୍ଧୁ’ ସମ୍ମାନ, ଖଡ଼ିଆଳ ଡିଗ୍ରୀ ମହିଳା ମହାବିଦ୍ୟାଳୟର ଅଧ୍ୟକ୍ଷା ଡ଼. ଲିଜା ଆଚାର୍ଯ୍ୟଙ୍କୁ ‘ପ୍ରକୃତି ମିତ୍ର’ ସମ୍ମାନ ଏବଂ ଖୋଲି ଭିତର ଗ୍ରାମକୁ ‘ପ୍ରକୃତି ଗ୍ରାମ’ ସମ୍ମାନ ପ୍ରଦାନ କରାଯାଇଥିଲା।
ଏକକ ବ୍ୟବହାରଯୋଗ୍ୟ ପ୍ଲାଷ୍ଟିକ୍‌ ବିରୋଧୀ ଜନଆନ୍ଦୋଳନ ର ସଫଳତାର ଏକ ବର୍ଷ ପୂର୍ତ୍ତି ଅବସରରେ ଜିଲ୍ଲାପାଳ ଜନସାଧାରଣଙ୍କୁ ଧନ୍ୟବାଦ ଜଣାଇଥିଲେ। ‘ସିଙ୍ଗଲ୍ ୟୁଜ୍ ପ୍ଲାଷ୍ଟିକ୍ ମୁକ୍ତ ନୂଆପଡ଼ା’ ଅଭିଯାନ କୁ ଆହୁରି ବ୍ୟାପକ କରି ଜିଲ୍ଲା କୁ ବିଶ୍ୱ ସ୍ତରରେ ଏକ ଆଦର୍ଶ ପରିବେଶ ବନ୍ଧବ ଜିଲ୍ଲା ଭାବେ ଗଢ଼ିବାକୁ ସେ ଆହ୍ୱାନ ଦେଇଥିଲେ।
ଉତ୍ସବ ଶେଷରେ ନୂଆପଡ଼ା ବିଜ୍ଞାପିତ ଅଞ୍ଚଳ ପରିଷଦ (ଏନ ଏ ସି) ପକ୍ଷରୁ ୱାର୍ଡ ନଂ–୧ ଶାଖାତୋରା ସ୍ଥିତ ଏକଲବ୍ୟ ବିଦ୍ୟାଳୟ ସମ୍ମୁଖ ରେ ବିଭିନ୍ନ ପ୍ରଜାତିର ଚାରାରୋପଣ କରାଯାଇ ସବୁଜ ଓ ସ୍ୱଚ୍ଛ ନୂଆପଡ଼ାର ସଂକଳ୍ପକୁ ଦୋହରାଇ ଦିଆଯାଇଥିଲା।କେବଳ ଭାଷଣ ନୁହେଁ, ବରଂ କାମରେ କରି ଦେଖାଇବା ପାଇଁ ଜିଲ୍ଲା ଆଇନ ସେବା ପ୍ରାଧିକରଣ ପକ୍ଷରୁ ଏକ ସ୍ୱତନ୍ତ୍ର ପ୍ଲାଷ୍ଟିକ ଆବର୍ଜନା ସଫେଇ ଅଭିଯାନ ଚଲାଯାଇଥିଲା। ଏହି ଶ୍ରମଦାନ ମାଧ୍ୟମରେ ସେହି ଅଞ୍ଚଳରୁ ପ୍ରାୟ ୮୭ କେଜି ପ୍ଲାଷ୍ଟିକ ଆବର୍ଜନା ସଂଗ୍ରହ କରାଯାଇ ସଫା କରାଯାଇଥିଲା, ଯାହା ସ୍ଥାନୀୟ ଅଞ୍ଚଳରେ ଏକ ବଡ଼ ସକାରାତ୍ମକ ବାର୍ତ୍ତା ଦେଇଛି।
ଏହି ଭବ୍ୟକାର୍ଯ୍ୟକ୍ରମ ରେ ଆରକ୍ଷୀ ଅଧିକ୍ଷକ ଅମ୍ରିତପାଳ ସିଂ,ଖଡ଼ିଆଳ ଡିଏଫଓ ଏମ୍‌. ଅଜିଜ୍ ଖାନ୍‌, ସୁନାବେଡ଼ା ଅଭୟାରଣ୍ୟ ବନଖଣ୍ଡ ଅଧିକାରୀ ସମୀର କୁମାର ସାହୁ, ଜିଲ୍ଲା ଆଇନ ସେବା ପ୍ରାଧିକରଣ ସଚିବ ନବନୀତା ଦାସ, ସିଆରପିଏଫ ର ବରିଷ୍ଠ ଅଧିକାରୀ ଏରିକ୍ ଗିଲବର୍ଟ ଜୋସ, ୧୯ ବାଟାଲିୟନ କମାଣ୍ଡେଣ୍ଟ ଦୀପକ ମଣି ତ୍ରିପାଠୀ, ଏସିଏଫ ଅଜୟ ଖେସ, କେନ୍ଦ୍ରୀୟ ବିଦ୍ୟାଳୟ ର ଅଧକ୍ଷ ବଳରାମ ମିଶ୍ର, ସମେତ ଶିକ୍ଷକ ଶିକ୍ଷୟତ୍ରୀ, ଅଧିକାର ମିତ୍ର ବହୁ ଛାତ୍ରଛାତ୍ରୀ ଓ ବୁଦ୍ଧିଜୀବୀ ଉପସ୍ଥିତ ଥିଲେ।