ନୂଆପଡ଼ାରେ ଜିଲ୍ଲା ସ୍ତରୀୟ କ୍ରୀଡ଼ା ପ୍ରତିଭା ଚୟନ ଶିବିର ଅନୁଷ୍ଠିତ : ରାଜ୍ୟ କ୍ରୀଡ଼ା ହଷ୍ଟେଲରେ ସ୍ଥାନ ପାଇବେ ଉଦୀୟମାନ ଖେଳାଳି।

ନୂଆପଡ଼ା- ୧୭/- (ସୁରେନ୍ଦ୍ର ତିୱାରୀ) ନୂଆପଡ଼ା ଜିଲ୍ଲାର କ୍ରୀଡ଼ା ପ୍ରତିଭାମାନଙ୍କୁ ଲୋକଲୋଚନକୁ ଆଣିବା ସହ ସେମାନଙ୍କୁ ଉପଯୁକ୍ତ ପ୍ରଶିକ୍ଷଣ ପ୍ରଦାନ କରିବା ଲକ୍ଷ୍ୟରେ ଆଜି ଜିଲ୍ଲା ସ୍ତରୀୟ କ୍ରୀଡ଼ା ପ୍ରତିଭା ଚୟନ ପ୍ରକ୍ରିୟା ସଫଳତାର ସହ ସମ୍ପନ୍ନ ହୋଇଯାଇଛି। ସ୍ଥାନୀୟ ସରକାରୀ ବାଳିକା ଉଚ୍ଚ ବିଦ୍ୟାଳୟ ଏବଂ ପୋଲିସ ପଡ଼ିଆଠାରେ ଆୟୋଜିତ ଏହି ଶିବିରରେ ବିଶେଷ ଭାବେ ଭଲିବଲ୍, ଖୋ-ଖୋ ଏବଂ ଆଥଲେଟିକ୍ସ ବିଭାଗରେ ଶତାଧିକ ପ୍ରତିଭା ନିଜର ଦକ୍ଷତା ପ୍ରଦର୍ଶନ କରିଛନ୍ତି।
ପୂର୍ବରୁ ବ୍ଲକ୍ ସ୍ତରରେ ଅନଲାଇନ୍ ମାଧ୍ୟମରେ ପଞ୍ଜିକୃତ ହୋଇଥିବା ବାଳକ ଓ ବାଳିକାମାନଙ୍କ ମଧ୍ୟରୁ ଯୋଗ୍ୟ ପ୍ରତିଭାଙ୍କୁ ବଛାଯାଇଥିଲା। ସେମାନଙ୍କ ପାରଦର୍ଶିତା ପ୍ରମାଣପତ୍ରକୁ ରାଜ୍ୟ କ୍ରୀଡ଼ା ବିଭାଗ ଦ୍ୱାରା ଯାଞ୍ଚ କରାଯିବା ପରେ ଆଜି ଜିଲ୍ଲା ସ୍ତରୀୟ ଚୟନ ଅନୁଷ୍ଠିତ ହୋଇଥିଲା। ଏହି ଶିବିରରେ କୃତକାର୍ଯ୍ୟ ହୋଇଥିବା ଖେଳାଳିଙ୍କ ତାଲିକା ପୁନର୍ବାର ରାଜ୍ୟ କାର୍ଯ୍ୟାଳୟକୁ ପ୍ରେରଣ କରାଯାଇଛି। ଆଗାମୀ ଦିନରେ ଏହି ଶ୍ରେଷ୍ଠ ଖେଳାଳିମାନଙ୍କୁ ରାଜ୍ୟ ସ୍ତରୀୟ ପ୍ରତିଯୋଗିତା ପାଇଁ ଆମନ୍ତ୍ରଣ କରାଯିବ ଏବଂ ସଫଳ ପ୍ରତିଯୋଗୀଙ୍କୁ ଓଡ଼ିଶାର ବିଭିନ୍ନ ସରକାରୀ କ୍ରୀଡ଼ା ଛାତ୍ରାବାସ ରେ ରହି ଉଚ୍ଚକୋଟୀର ପ୍ରଶିକ୍ଷଣ ନେବାର ସୁଯୋଗ ମିଳିବ।
ଏହି ଅବସରରେ ଜିଲ୍ଲା କ୍ରୀଡ଼ା ଅଧିକାରୀ ରାଜେନ୍ଦ୍ର ପ୍ରସାଦ ବଢାଇ ଖେଳାଳିମାନଙ୍କୁ ଉତ୍ସାହିତ କରି କହିଛନ୍ତି ଯେ, “କ୍ରୀଡ଼ା କ୍ଷେତ୍ରରେ ସଫଳତା ପାଇଁ ନିୟମିତ ଅଭ୍ୟାସ ଓ ମାନସିକ ଦୃଢ଼ତା ଏକାନ୍ତ ଆବଶ୍ୟକ। ରାଜ୍ୟ ସରକାରଙ୍କ ଏହି ଅଭିନବ ପ୍ରୟାସ ଦ୍ୱାରା ଆଗାମୀ ଦିନରେ ନୂଆପଡ଼ାରୁ ଅନ୍ତର୍ଜାତୀୟ ସ୍ତରର ଖେଳାଳି ସୃଷ୍ଟି ହେବେ ବୋଲି ଆମେ ଆଶାବାଦୀ।” ସମଗ୍ର ପ୍ରକ୍ରିୟାକୁ ଜିଲ୍ଲା ଶାରୀରିକ ଶିକ୍ଷା ଅଧିକାରୀ ରତନ ସିଂ ବାରିକଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ପରିଚାଳନା କରାଯାଇଥିଲା। ଚୟନକର୍ତ୍ତା ଭାବେ ମହତାବ ଆଦଯୁଆଡ଼, ସରୋଜ କୁମାର ପ୍ରଧାନ, ମୋହନ କୁମାର ମହାନ୍ତ, କୃଷ୍ଣ ଶ୍ୟାମ ସବାର, ଭାରତ ପ୍ରଧାନ, ରାକେଶ କୁମାର ଦଳେଇ, ହିମାଂଶୁ ଶେଖର ମହାନ୍ତ ଏବଂ ଦେବବ୍ରତ ସାହୁ ପ୍ରମୁଖ କ୍ରୀଡ଼ା ଶିକ୍ଷକମାନେ ଦାୟିତ୍ୱ ନିର୍ବାହ କରିଥିଲେ।
ପରିଶେଷରେ, ଜିଲ୍ଲା ପ୍ରଶାସନର ମାର୍ଗଦର୍ଶନ ପାଇଁ ଜିଲ୍ଲାପାଳ ମଧୁସୂଦନ ଦାଶ, ଅତିରିକ୍ତ ଜିଲ୍ଲାପାଳ ସୁବାସ ଚନ୍ଦ୍ର ରଇତ, ଉପଜିଲ୍ଲାପାଳ ସୁର୍ମି ସୋରେନ ଏବଂ ସମସ୍ତ ବିଭାଗୀୟ ଅଧିକାରୀ ଓ ଗଣମାଧ୍ୟମ ପ୍ରତିନିଧିଙ୍କୁ କ୍ରୀଡ଼ା ବିଭାଗ ପକ୍ଷରୁ କୃତଜ୍ଞତା ଜ୍ଞାପନ କରାଯାଇଛି।