ନୂଆପଡ଼ାରେ ସଫଳତାର ସହ ଅନୁଷ୍ଠିତ ହେଲା ଭୀମଭୋଇ ଭିନ୍ନକ୍ଷମ ସାମର୍ଥ୍ୟ ଶିବିର।

ନୂଆପଡ଼ା – ୩୦/୦୭- ଦିବ୍ୟାଙ୍ଗଜନଙ୍କୁ ଗୋଟିଏ ସ୍ଥାନରେ ବିଭିନ୍ନ ସରକାରୀ ସେବା ଓ ଯୋଜନାର ସୁବିଧା ପ୍ରଦାନ କରିବା ଉଦ୍ଦେଶ୍ୟରେ ନୂଆପଡ଼ା ବ୍ଲକ ପ୍ରଶାସନ ପକ୍ଷରୁ ଭୀମଭୋଇ ଭିନ୍ନକ୍ଷମ ସାମର୍ଥ୍ୟ ଶିବିର ସଫଳତାର ସହ ଆୟୋଜିତ ହୋଇଛି। ଏହି ଶିବିରରେ ଦିବ୍ୟାଙ୍ଗଜନଙ୍କ ପଞ୍ଜୀକରଣ, ସ୍ୱାସ୍ଥ୍ୟ ପରୀକ୍ଷା, ଭିନ୍ନକ୍ଷମତା ମୂଲ୍ୟାଙ୍କନ, ବର୍ଗୀକରଣ ଏବଂ ବିଭିନ୍ନ କଲ୍ୟାଣମୂଳକ ଯୋଜନାରେ ସାମିଲ କରିବା ଉପରେ ଗୁରୁତ୍ୱ ଦିଆଯାଇଥିଲା।
ଶିବିରରେ ଜିଲ୍ଲାପାଳ ମଧୁସୂଦନ ଦାଶ ମୁଖ୍ୟ ଅତିଥି ଭାବେ ଯୋଗଦେଇ କହିଥିଲେ ଯେ, ପ୍ରତ୍ୟେକ ଯୋଗ୍ୟ ଦିବ୍ୟାଙ୍ଗ ହିତାଧିକାରୀଙ୍କ ନିକଟରେ ସରକାରୀ ସେବା ପହଞ୍ଚାଇବା ପ୍ରଶାସନର ପ୍ରମୁଖ ଦାୟିତ୍ୱ। ଏଭଳି ସାମର୍ଥ୍ୟ ଶିବିର ଦିବ୍ୟାଙ୍ଗଜନଙ୍କ ସଶକ୍ତିକରଣ ଓ ସାମାଜିକ ଅନ୍ତର୍ଭୁକ୍ତି ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ସେ ମତ ପ୍ରକାଶ କରିଥିଲେ।
କାର୍ଯ୍ୟକ୍ରମରେ ପଞ୍ଚାୟତ ସମିତି ଅଧ୍ୟକ୍ଷା ତାରେଶ୍ୱରୀ ସାହୁ, ଉପାଧ୍ୟକ୍ଷ ଦିଲୀପ ନିର୍ମଳକର, ଜିଲ୍ଲା ପରିଷଦ ସଦସ୍ୟ ଭାନୁ ପ୍ରତାପ ସିଂ ମାଝୀ ଓ ଭାରତଲାଲ ରାଉତ, ସମାଜସେବୀ ଧନୀରାମ ସାହୁ, ଏସ୍‌.ଏସ୍‌.ଏସ୍‌.ଓ. ସ୍ମୃତିରେଖା ନନ୍ଦଙ୍କ ସମେତ ବହୁ ଜନପ୍ରତିନିଧି ଓ ଅଧିକାରୀ ଉପସ୍ଥିତ ଥିଲେ। ବିଡିଓ ରୋହିତ କୁମାର ଭୋଇ ଶିବିରର ସାମଗ୍ରିକ ପରିଚାଳନା କରିଥିବା ବେଳେ ପିଇଓ ଭାନୁ ପ୍ରକାଶ ଦଣ୍ଡସେନା ଏବଂ ଜିଲ୍ଲା ସ୍ୱଚ୍ଛତା ସଂଯୋଜକ ଅନିଲ କୁମାର ଲେଙ୍କା ମଞ୍ଚ ପରିଚାଳନା କରିଥିଲେ।
ଶିବିରରେ ମୋଟ ୨୫୨ ଜଣ ଦିବ୍ୟାଙ୍ଗ ବ୍ୟକ୍ତି ପଞ୍ଜୀକରଣ କରିଥିବା ବେଳେ ୧୨୧ ଜଣଙ୍କ ଭିନ୍ନକ୍ଷମତାର ମୂଲ୍ୟାଙ୍କନ ଓ ବର୍ଗୀକରଣ କରାଯାଇଥିଲା। ସେଥିମଧ୍ୟରେ ୭୧ ଜଣ ଚଳନ ଜନିତ, ୨୦ ଜଣ ଶ୍ରବଣ ବାଧିତ, ୧୬ ଜଣ ଦୃଷ୍ଟି ବାଧିତ, ୯ ଜଣ ମାନସିକ ଭିନ୍ନକ୍ଷମ ଏବଂ ୫ ଜଣ ସିକଲ୍ ସେଲ୍ ଜନିତ ଭିନ୍ନକ୍ଷମତା ବର୍ଗରେ ଚିହ୍ନଟ ହୋଇଥିଲେ।
ଏହାବ୍ୟତୀତ ୧୦୧ ଜଣ ହିତାଧିକାରୀଙ୍କୁ ବିଭିନ୍ନ ସରକାରୀ ଯୋଜନାରେ ସାମିଲ କରିବା ପାଇଁ ଚିହ୍ନଟ କରାଯାଇଛି। ସେମାନଙ୍କ ମଧ୍ୟରେ ବାଣୀଶ୍ରୀ ଯୋଜନା, ବିବାହ ପ୍ରୋତ୍ସାହନ ଯୋଜନା, ଭତ୍ତା ଯୋଜନା, ସହାୟକ ଉପକରଣ, ବସ୍ ପାସ୍, ରେସନ କାର୍ଡ ଓ ଗ୍ରାମୀଣ ଆବାସ ଯୋଜନା ପାଇଁ ଯୋଗ୍ୟ ହିତାଧିକାରୀଙ୍କୁ ଚିହ୍ନଟ କରାଯାଇଛି।
ଏହି ଶିବିର ମାଧ୍ୟମରେ ଦିବ୍ୟାଙ୍ଗଜନଙ୍କୁ ସରକାରୀ ସେବା ସହ ଯୋଡ଼ିବା ଏବଂ ସେମାନଙ୍କୁ ସାମାଜିକ ଓ ଆର୍ଥିକ ଭାବେ ସଶକ୍ତ କରିବା ଦିଗରେ ପ୍ରଶାସନର ପ୍ରୟାସକୁ ବେଶ୍ ପ୍ରଶଂସା କରାଯାଉଛି।