ନୂଆପଡ଼ା : ନାବାଳିକା ଯୌନ ନିର୍ଯାତନା ପୀଡ଼ିତା ଙ୍କୁ ୧ ଲକ୍ଷ ଟଙ୍କାର ଆର୍ଥିକ କ୍ଷତିପୂରଣ ପ୍ରଦାନ।

ନୂଆପଡ଼ା- ୯/୬- ନୂଆପଡ଼ା ଜିଲ୍ଲାରେ ଜଣେ ନାବାଳିକା ଯୌନ ଦୁଷ୍କର୍ମ ପୀଡ଼ିତା ଙ୍କୁ ଆର୍ଥିକ ସହାୟତା ପ୍ରଦାନ କରାଯାଇଛି। ‘ଓଡ଼ିଶା ରାଜ୍ୟ ପୀଡ଼ିତ କ୍ଷତିପୂରଣ ଯୋଜନା’ ଅଧୀନରେ ପୀଡ଼ିତାଙ୍କୁ ତୁରନ୍ତ ୧ ଲକ୍ଷ ଟଙ୍କାର ଆର୍ଥିକ କ୍ଷତିପୂରଣ ରାଶି ଯୋଗାଇ ଦିଆଯାଇଛି।
ଜିଲ୍ଲା ଓ ଦୌରା ଜଜ୍ ତଥା ଜିଲ୍ଲା ଆଇନ ସେବା ପ୍ରାଧିକରଣ ର ଅଧ୍ୟକ୍ଷ ସମର ବିଳାସ ବେହେରାଙ୍କ ନିର୍ଦ୍ଦେଶକ୍ରମେ ଏହି ସହାୟତା ରାଶି ମଞ୍ଜୁର ହୋଇଛି।
ମାମଲାର ଗୁରୁତ୍ୱକୁ ବିଚାର କରି ନୂଆପଡ଼ା ର ଅତିରିକ୍ତ ଜିଲ୍ଲା ଓ ଦୌରା ଜଜ୍ ତଥା ପୋକ୍ସୋ କୋର୍ଟର ବିଚାରପତି ସୁନୀଲ କୁମାର ଦାସ ପୋକ୍ସୋ ଅଧିନିୟମ ଅନୁଯାୟୀ ପୀଡ଼ିତା ଙ୍କୁ ଏହି ଆର୍ଥିକ କ୍ଷତିପୂରଣ ଦେବା ପାଇଁ ସୁପାରିଶ କରିଥିଲେ। ବିଚାରପତିଙ୍କ ଏହି ସୁପାରିଶ ଆଧାରରେ ଜିଲ୍ଲା ଆଇନ ସେବା ପ୍ରାଧିକରଣ ପକ୍ଷରୁ ତୁରନ୍ତ ପଦକ୍ଷେପ ଗ୍ରହଣ କରାଯାଇଥିଲା।
ପ୍ରାଧିକରଣ ର ସଚିବ ନବନୀତା ଦାଶ ଉକ୍ତ ନାବାଳିକାଙ୍କୁ ଏହି ଏକ ଲକ୍ଷ ଟଙ୍କାର ଅର୍ଥରାଶି ପ୍ରଦାନ କରିଛନ୍ତି। ଏହା ସହିତ ଏହି ଅର୍ଥକୁ ନିଜର ଏବଂ ନିଜ ସନ୍ତାନ ର ଭବିଷ୍ୟତ ଓ ମଙ୍ଗଳ ନିମନ୍ତେ ସଦୁପଯୋଗ କରିବାକୁ ସେ ପୀଡ଼ିତା ଙ୍କୁ ପରାମର୍ଶ ଦେଇଛନ୍ତି।
ଜିଲ୍ଲା ଆଇନ ସେବା ପ୍ରାଧିକରଣ ର ଏହିଭଳି ସମ୍ବେଦନଶୀଳ ଓ ତ୍ୱରିତ ପଦକ୍ଷେପ ଯୋଗୁଁ ଅସହାୟ ପୀଡ଼ିତାଙ୍କ ପରିବାରକୁ ବଡ଼ ଆଶ୍ୱସ୍ତି ମିଳିଛି। ଏଥିସହିତ ପ୍ରଶାସନ ଓ ପ୍ରଚଳିତ ନ୍ୟାୟିକ ପ୍ରକ୍ରିୟା ଉପରେ ସାଧାରଣ ଜନତାଙ୍କର ବିଶ୍ୱାସ ଆହୁରି ଦୃଢ଼ ହୋଇଛି ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି।
(ନୋଟ : ସାମ୍ବାଦିକତା ନୀତି ଏବଂ ଆଇନଗତ ସୁରକ୍ଷା ଦୃଷ୍ଟିରୁ ପୀଡ଼ିତା କିମ୍ବା ତାଙ୍କ ପରିବାରର ପରିଚୟ ଗୋପନ ରଖାଯାଇଛି।)