ନୂଆପଡ଼ା ରେ ଜିଲ୍ଲାସ୍ତରୀୟ ନାର୍କୋ ବୈଠକ : ଜିଲ୍ଲାକୁ ମାଦକ ଦ୍ରବ୍ୟ ମୁକ୍ତ କରିବାକୁ ଜିଲ୍ଲାପାଳଙ୍କ ଆହ୍ୱାନ।

ନୂଆପଡ଼ା -୨୪/୬ ନୂଆପଡ଼ା ଜିଲ୍ଲାରେ ନାର୍କୋ ସମନ୍ୱୟ କେନ୍ଦ୍ର ବ୍ୟବସ୍ଥା ଅଧୀନରେ ଜିଲ୍ଲାସ୍ତରୀୟ କମିଟିର ଏକ ଗୁରୁତ୍ୱପୂର୍ଣ୍ଣ ସମୀକ୍ଷା ବୈଠକ ସ୍ଥାନୀୟ ଜିଲ୍ଲା ମୁଖ୍ୟାଳୟ ସମ୍ମିଳନୀ କକ୍ଷଠାରେ ଅନୁଷ୍ଠିତ ହୋଇଯାଇଛି। ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ଜିଲ୍ଲାରୁ ନିଶା କାରବାରର ସଂପୂର୍ଣ୍ଣ ନିପାତ ଏବଂ ମାଦକଦ୍ରବ୍ୟର ବ୍ୟବହାର ରୋକିବା ନେଇ ବ୍ୟାପକ ଆଲୋଚନା କରାଯାଇଛି।
ବୈଠକ ପ୍ରାରମ୍ଭରେ ପୋଲିସ ଇନ୍ସପେକ୍ଟର ବି. ରୁଦ୍ରିୟା ଉପସ୍ଥିତ ସମସ୍ତ ଅତିଥି ଓ ସଦସ୍ୟମାନଙ୍କୁ ସ୍ୱାଗତ ଜଣାଇବା ସହ ବୈଠକର ଆଭିମୁଖ୍ୟ ଏବଂ ଉଦ୍ଦେଶ୍ୟ ସମ୍ପର୍କରେ ସମ୍ୟକ ସୂଚନା ପ୍ରଦାନ କରିଥିଲେ।
ଜିଲ୍ଲାରେ ବେଆଇନ ମାଦକଦ୍ରବ୍ୟ କାରବାର ଉପରେ ଅଙ୍କୁଶ ଲଗାଇବା ପାଇଁ ଜିଲ୍ଲାପାଳ ଶ୍ରୀ ଦାଶ ମାଦକଦ୍ରବ୍ୟ ବିରୋଧୀ ସଚେତନତା ଅଭିଯାନକୁ ଆହୁରି ବ୍ୟାପକ ଓ ଜୋରଦାର କରିବାକୁ ବିଭାଗୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ଏକ ସମନ୍ୱିତ କାର୍ଯ୍ୟପଦ୍ଧତି ଆପଣାଇ ଜିଲ୍ଲାକୁ ସମ୍ପୂର୍ଣ୍ଣ ଅବୈଧ ମାଦକମୁକ୍ତ କରିବା ପାଇଁ ସମସ୍ତ ସମ୍ପୃକ୍ତ ବିଭାଗ ମିଳିତ ଓ ଏକତ୍ରିତ ଭାବେ କାର୍ଯ୍ୟ କରିବା ଜରୁରୀ ବୋଲି ସେ ପ୍ରକାଶ କରିଥିଲେ।
ଏହି ସମୀକ୍ଷା ବୈଠକରେ ଅନ୍ୟମାନଙ୍କ ମଧ୍ୟରେ ଭାରପ୍ରାପ୍ତ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡ. ଦ୍ୱାରିକାନାଥ ଶତପଥୀ, ଅବକାରୀ ଅଧିକ୍ଷକ ସଂଘମିତ୍ରା ପ୍ରଧାନ, ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଅନନ୍ତ କୁମାର ହେମ୍ବ୍ରମ ଏବଂ ଜିଲ୍ଲା ଶିକ୍ଷା ଅଧିକାରୀ ପ୍ରଶାନ୍ତ କୁମାର ମହାନ୍ତିଙ୍କ ସମେତ ବିଭିନ୍ନ ଲାଇନ ବିଭାଗର ବରିଷ୍ଠ ପଦାଧିକାରୀମାନେ ଉପସ୍ଥିତ ରହି ନିଜ ନିଜ ବିଭାଗ ପକ୍ଷରୁ ନିଆଯାଉଥିବା ପଦକ୍ଷେପ ବାବଦରେ ଅବଗତ କରାଇଥିଲେ।