“ବିକାଶର ହିସାବ ଦେଉଛୁ, ଆଶୀର୍ବାଦ ମଧ୍ୟ ନେଉଛୁ” : ୱାର୍ଡବାସୀଙ୍କ ସହ ସିଧା ସମ୍ବାଦରେ ଏନ୍‌ଏସି ଅଧ୍ୟକ୍ଷା ଡ. ସୋନିଆ ଜୈନ।

ନୂଆପଡା – ୧୮/୬- “ଆମେ ବିକାଶ କରିଛୁ, ସେଥି ପାଇଁ ଜନତା ଙ୍କ ପାଖ କୁ ଯିବାର ସାହସ ରଖିଛୁ। ଲୋକଙ୍କୁ ଆମ କାର୍ଯ୍ୟର ହିସାବ ଦେଉଛୁ ଏବଂ ସେମାନଙ୍କ ଆଶୀର୍ବାଦ ମଧ୍ୟ ଗ୍ରହଣ କରୁଛୁ।” ଏଭଳି ଦୃଢ଼ ମତ ପ୍ରକାଶ କରିଛନ୍ତି ଖରିଆର ରୋଡ ଏନ୍‌ଏସି ଅଧ୍ୟକ୍ଷା ଡ. ସୋନିଆ ଜୈନ।ଗତ ବୁଧବାର ୱାର୍ଡ ନଂ–୧୨ ରେ ଆୟୋଜିତ ଜନସମ୍ପର୍କ ଅଭିଯାନ ଓ ନାଗରିକ ସହଭାଗିତା କାର୍ଯ୍ୟକ୍ରମରେ ୱାର୍ଡବାସୀଙ୍କ ସହ ଆତ୍ମୀୟ ଆଲୋଚନା କରିବା ସହ ଗତ ଚାରି ବର୍ଷ ର ବିକାଶମୂଳକ କାର୍ଯ୍ୟର ହିସାବ ଉପସ୍ଥାପନ କରାଯାଇଥିଲା।
ଏହି ଅବସରରେ ଡ. ଜୈନ କହିଥିଲେ ଯେ, ଗତ ଚାରି ବର୍ଷର ଯାତ୍ରା କେବଳ ଏକ ପ୍ରଶାସନିକ କାର୍ଯ୍ୟକାଳ ନୁହେଁ ବରଂ ଖରିଆର ରୋଡ କୁ ଏକ ଆଧୁନିକ ଓ ସୁନ୍ଦର ନଗର ରେ ପରିଣତ କରିବାର ଏକ ଗୌରବମୟ ଅଧ୍ୟାୟ। ଜାତି, ବର୍ଗ ଓ ଭୋଟ ବ୍ୟାଙ୍କ ରାଜନୀତିରୁ ଉର୍ଦ୍ଧ୍ୱରେ ଉଠି ନଗର ପାଳିକା ‘ସବକା ସାଥ, ସବକା ବିକାଶ’ ନୀତିକୁ ତୃଣମୂଳ ସ୍ତରରେ ସଫଳତାର ସହ କାର୍ଯ୍ୟକାରୀ କରିପାରିଛି।
ଡ. ସୋନିଆ ଜୈନ ଙ୍କ ଅଧ୍ୟକ୍ଷତା ରେ ଆୟୋଜିତ ଏହି କାର୍ଯ୍ୟକ୍ରମ ରେ ୱାର୍ଡ କାଉନ୍ସିଲର ଶେଖର ଜୈନ, କାର୍ଯ୍ୟନିର୍ବାହୀ ଅଧିକାରୀ କମଳାସନ ରଥ, ସାଂସଦ ପ୍ରତିନିଧି ଗୋଲ୍ଡି ସୋମନାଥ ଅଗ୍ରୱାଲ ଙ୍କ ସମେତ ବହୁ ସଂଖ୍ୟକ ୱାର୍ଡବାସୀ ଉପସ୍ଥିତ ଥିଲେ।
କାର୍ଯ୍ୟକ୍ରମରେ ନାଗରିକମାନେ ନିଜ ଅଞ୍ଚଳର ବିଭିନ୍ନ ସମସ୍ୟା ଓ ଆବଶ୍ୟକତା ସମ୍ପର୍କ ରେ ମତାମତ ରଖିଥିବା ବେଳେ, ଆଗାମୀ ଦିନରେ ବିକାଶର ଧାରାକୁ ଆହୁରି ତ୍ୱରାନ୍ୱିତ କରିବା ପାଇଁ ପ୍ରଶାସନ ପକ୍ଷରୁ ପ୍ରତିଶ୍ରୁତି ଦିଆଯାଇଥିଲା।
“ଜନତାଙ୍କ ବିଶ୍ୱାସ ହିଁ ଆମର ସବୁଠାରୁ ବଡ଼ ଶକ୍ତି। ସେହି ବିଶ୍ୱାସ କୁ ପାଥେୟ କରି ଖରିଆର ରୋଡ ନଗର ର ସର୍ବାଙ୍ଗୀଣ ବିକାଶ ଅଭିଯାନ ଆଗାମୀ ଦିନରେ ମଧ୍ୟ ଅବ୍ୟାହତ ରହିବ,” ବୋଲି ଅଧ୍ୟକ୍ଷା ଡ. ଜୈନ କହିଥିଲେ।