ସିବିଏସଇ ଦ୍ୱାଦଶ ପରୀକ୍ଷା: ନୂଆପଡ଼ାର ଅଂଶ ଅଗ୍ରୱାଲ ହାସଲ କଲେ ୯୪.୪% ନମ୍ବର, ଜିଲ୍ଲାରେ ଦ୍ୱିତୀୟ ସ୍ଥାନ।

ନୂଆପଡ଼ା- ୧୯/୫- କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (CBSE) ଦ୍ୱାରା ପରିଚାଳିତ ଦ୍ୱାଦଶ ଶ୍ରେଣୀ ପରୀକ୍ଷାରେ ନୂଆପଡ଼ା ଜିଲ୍ଲାର ଜଣେ ମେଧାବୀ ଛାତ୍ର ବିପୁଳ ସଫଳତା ହାସଲ କରି ସମଗ୍ର ଅଞ୍ଚଳ ପାଇଁ ଗୌରବ ଆଣିଦେଇଛନ୍ତି। ସ୍ଥାନୀୟ ୱାର୍ଡ ନମ୍ବର ୧୦, ଅଗ୍ରୱାଲ ପଡ଼ା ନିବାସୀ ଅଂଶ ଅଗ୍ରୱାଲ ଚଳିତ ବର୍ଷ ଦ୍ୱାଦଶ ପରୀକ୍ଷାରେ ୯୪.୪ ପ୍ରତିଶତ ନମ୍ବର ରଖି ଉତ୍ତୀର୍ଣ୍ଣ ହୋଇଛନ୍ତି।
ସ୍ଥାନୀୟ ନବୋଦିତ୍ୟ ସ୍କୁଲର ଛାତ୍ର ଅଂଶ ନିଜର ଏହି ଶ୍ରେଷ୍ଠ ପ୍ରଦର୍ଶନ ବଳରେ ନୂଆପଡ଼ା ବ୍ଲକରେ ପ୍ରଥମ ଏବଂ ସମଗ୍ର ନୂଆପଡ଼ା ଜିଲ୍ଲାରେ ଦ୍ୱିତୀୟ ସ୍ଥାନ ହାସଲ କରିଛନ୍ତି। ସେ ସ୍ଥାନୀୟ ଶିକ୍ଷୟିତ୍ରୀ ଅନିତା ଅଗ୍ରୱାଲ ଏବଂ ସ୍ୱର୍ଗତ ମହେଶ ଅଗ୍ରୱାଲଙ୍କ ପୁତ୍ର ଅଟନ୍ତି।
ମାତୃ ପ୍ରେରଣା ଓ କଠିନ ପରିଶ୍ରମ ଆଣିଦେଲା ସଫଳତା।
ପିତାଙ୍କ ଦେହାନ୍ତ ପରେ ଅଂଶଙ୍କ ଜୀବନରେ ଅନେକ ସଂଘର୍ଷ ଆସିଥିଲା, ମାତ୍ର ତାଙ୍କ ମାଆ ତାଙ୍କୁ ସଦାସର୍ବଦା ଆଗକୁ ବଢ଼ିବା ପାଇଁ ପ୍ରେରଣା ଯୋଗାଇଥିଲେ। ନିଜର ଏହି ସଫଳତାର ଶ୍ରେୟ ଅଂଶ ତାଙ୍କ ମାତା-ପିତା, ଶିକ୍ଷକ ଶିକ୍ଷୟିତ୍ରୀଙ୍କ ସଠିକ୍ ମାର୍ଗଦର୍ଶନ, ନିରନ୍ତର କଠିନ ପରିଶ୍ରମ ଏବଂ ପରିବାରର ସହଯୋଗକୁ ଦେଇଛନ୍ତି।
ଭବିଷ୍ୟତର ଲକ୍ଷ୍ୟ
ନିଜର ଆଗାମୀ ଯୋଜନା ବିଷୟରେ ସୂଚନା ଦେଇ ଅଂଶ କହିଛନ୍ତି ଯେ, ସେ ଦେଶର ଏକ ପ୍ରତିଷ୍ଠିତ କଲେଜରେ ନାମ ଲେଖାଇ ଉଚ୍ଚଶିକ୍ଷା ଗ୍ରହଣ କରିବାକୁ ଚାହାଁନ୍ତି। ନିଜର ମନୋନୀତ କ୍ଷେତ୍ରରେ ଶ୍ରେଷ୍ଠ ପ୍ରଦର୍ଶନ କରିବା ସହ ଆଗକୁ ମଧ୍ୟ ଏହିପରି ପରିଶ୍ରମ ଜାରି ରଖିବାକୁ ସେ ଲକ୍ଷ୍ୟ ରଖିଛନ୍ତି।
ଅଂଶଙ୍କର ଏହି ଗୌରବମୟ ସଫଳତା ପାଇଁ ଅଗ୍ରୱାଲ ପଡ଼ା ସମେତ ସମଗ୍ର ନୂଆପଡ଼ା ଅଞ୍ଚଳରେ ଖୁସିର ଲହରୀ ଖେଳିଯାଇଛି ଏବଂ ବିଭିନ୍ନ ମହଲରୁ ତାଙ୍କୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି। ସେହି ପରି ନବୋଦିତ୍ୟ ବିଦ୍ୟାଳୟ ର ଛାତ୍ର ଆୟୁଷ କୁମାର ଯୋଷୀ ୯୧% ଓ ସୁଶ୍ରୀ ସମୀକ୍ଷା ସିଂ ୯୦ ପ୍ରତିଶତ ନମ୍ୱର ରଖି ବିଦ୍ୟାଳୟ ତଥା ଅଞ୍ଚଳ ରେ ସୁନାମ ରଖିଛନ୍ତି।