ନୂଆପଡ଼ାରେ ଜିଲ୍ଲା ସ୍ତରୀୟ ନାର୍କୋ ସମନ୍ୱୟ କେନ୍ଦ୍ର ବୈଠକ ଅନୁଷ୍ଠିତ : ମାଦକ ବିରୋଧୀ ସଚେତନତା ଉପରେ ଗୁରୁତ୍ୱ l

ନୂଆପଡ଼ା -୧୮/୦୩ – ନୂଆପଡା ଜିଲ୍ଲା ସ୍ତରୀୟ ନାର୍କୋ ସମନ୍ୱୟ କେନ୍ଦ୍ର ମେକାନିଜମ କମିଟିର ବୈଠକ ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ମୁଖ୍ୟାଳୟ ସ୍ଥିତ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଥିଲା।ବୈଠକର ଆରମ୍ଭରେ ଇନ୍ସପେକ୍ଟର ଅଫ ପୋଲିସ ବି. ରୁଦ୍ରିୟା ସମସ୍ତଙ୍କୁ ସ୍ୱାଗତ ଜଣାଇବା ସହିତ ବୈଠକର ଉଦ୍ଦେଶ୍ୟ ବିଷୟରେ ଅବଗତ କରାଇଥିଲେ।
ବୈଠକରେ ଜିଲ୍ଲାପାଳ ମାଦକଦ୍ରବ୍ୟ ବିରୋଧୀ ସଚେତନତାକୁ ଅଧିକ ଜୋରଦାର କରିବାକୁ ନିର୍ଦ୍ଦେଶ ଦେଇଥିଲେ। ସେ କହିଲେ ଯେ, ସମସ୍ତ ବିଦ୍ୟାଳୟରେ ୯ମ ଶ୍ରେଣୀର ଛାତ୍ରୀମାନଙ୍କୁ ଏବଂ ଯେଉଁଠାରେ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ପଢ଼ା ହେଉଛି ସେଠାରେ ଏକାଦଶ ଶ୍ରେଣୀର ଛାତ୍ରୀମାନଙ୍କୁ “ବ୍ରାଣ୍ଡ ଆମ୍ବାସାଡର” ଭାବେ ନିୟୋଜିତ କରି “ଡ୍ରଗ୍ସକୁ ନା” ବାର୍ତ୍ତା ପ୍ରଚାର କରାଯିବ।
ଏହାସହିତ ସମସ୍ତ ଔଷଧ ଦୋକାନରେ ସିସିଟିଭି କ୍ୟାମେରା ସ୍ଥାପନ କରିବାକୁ ଓ ଡ୍ରଗ୍ସ ଇନ୍ସପେକ୍ଟରଙ୍କୁ ଏହାର ନିୟମିତ ନିରୀକ୍ଷଣ କରି କୌଣସି ଉଲ୍ଲଂଘନ ଦେଖାଦେଲେ ତତ୍କ୍ଷଣାତ ଜିଲ୍ଲା ପ୍ରଶାସନକୁ ଅବଗତ କରାଇବାକୁ ନିର୍ଦ୍ଦେଶ ଦିଆଯାଇଥିଲା।
ବୈଠକରେ ଭାରପ୍ରାପ୍ତ ସିଡିଏମଓ ଡ. ଦ୍ୱାରିକାନାଥ ଶତପଥୀ, ଏସିଏଫ ମହମ୍ମଦ ମୁସ୍ତାଫା ସାଲେହା, ସିଡିଏଓ ପ୍ରଦୀପ କୁମାର ନାୟକ, ଅବକାରୀ ଅଧିକ୍ଷକ ସଂଘମିତ୍ରା ପ୍ରଧାନ, ଡିଏସଏସଓ ଅନନ୍ତ କୁମାର ହେମ୍ବ୍ରମ, ଡିଇଓ ପ୍ରଶାନ୍ତ କୁମାର ମହାନ୍ତି ଓ ଡ୍ରଗ୍ସ ଇନ୍ସପେକ୍ଟର ପ୍ରସନ୍ନଜିତ ମହାନ୍ତି ପ୍ରମୁଖ ଉପସ୍ଥିତ ଥିଲେ।

ବୈଠକରେ ମାଦକଦ୍ରବ୍ୟ ବିରୋଧରେ ସମନ୍ୱିତ କାର୍ଯ୍ୟପଦ୍ଧତି ଗ୍ରହଣ କରି ଜିଲ୍ଲାକୁ ଅବୈଧ ମାଦକମୁକ୍ତ କରିବା ପାଇଁ ସମସ୍ତ ବିଭାଗ ଏକତ୍ରିତ ଭାବେ କାର୍ଯ୍ୟ କରିବାକୁ ଜିଲ୍ଲପାଳ ଆହ୍ୱାନ କରିଥିଲେ ।