ଖଇରାର ନାଙ୍ଗପଡ଼ାରେ ଭକ୍ତିମୟ ପରିବେଶ : ଆରମ୍ଭ ହେଲା ଷୋହଳ ପ୍ରହରୀ ନାମଯଜ୍ଞ ।

ବୋଡେ଼ନ -୨୨/୪ (ଜଗତ ରାମ ଦଣ୍ଡ ସେନା) ନୂଆପଡ଼ା ଜିଲ୍ଲା ବୋଡେ଼ନ ବ୍ଲକ ଅନ୍ତର୍ଗତ ଖଇରା ଗ୍ରାମର ନାଙ୍ଗପଡ଼ାରେ ଏକ ଆଧ୍ୟାତ୍ମିକ ପରିବେଶ ମଧ୍ୟରେ ଷୋହଳ ପ୍ରହରୀ ନାମଯଜ୍ଞ ଅନୁଷ୍ଠିତ ହୋଇଛି। ମଙ୍ଗଳବାର ଦିନ ଶୁଭ କଳସ ଯାତ୍ରା ଓ ଅଧିବାସ କାର୍ଯ୍ୟ ସମ୍ପନ୍ନ ହେବା ପରେ, ବୁଧବାର ଠାରୁ ବିଧିବଦ୍ଧ ଭାବେ ଅଖଣ୍ଡ ନାମ ସଂକୀର୍ତ୍ତନ ଆରମ୍ଭ ହୋଇଛି।
ଏହି ପବିତ୍ର ଯଜ୍ଞରେ ମଲଖମ ନାଗ ଓ ତାଙ୍କ ଧର୍ମପତ୍ନୀ ଜୟମନି ନାଗ କର୍ତ୍ତା ଭାବେ ଦାୟିତ୍ୱ ନିର୍ବାହ କରୁଛନ୍ତି। ପୂଜକ ଭାବେ ଜିତେନ୍ ଦାସ, ନବକିଶୋର ଯୋଷୀ ଓ ଶରତ ଦାସ ଯଜ୍ଞର ସମସ୍ତ ନୀତିକାନ୍ତି ସମ୍ପାଦନ କରୁଛନ୍ତି।
ଚଳିତ ବର୍ଷ ଏହି ମହୋତ୍ସବରେ ୭ଟି ସଂକୀର୍ତ୍ତନ ମଣ୍ଡଳୀ ଯୋଗ ଦେଇଛନ୍ତି। ସେମାନଙ୍କ ଦ୍ୱାରା ପରିବେଷିତ ହେଉଥିବା ହରିନାମ ସଂକୀର୍ତ୍ତନରେ ସମଗ୍ର ଅଞ୍ଚଳ ବୈକୁଣ୍ଠପୁରୀରେ ପରିଣତ ହୋଇଛି।
ମହୋତ୍ସବ ଅବସରରେ ପ୍ରତିଦିନ ଶ୍ରଦ୍ଧାଳୁଙ୍କ ପାଇଁ ଅନ୍ନ ପ୍ରସାଦ (ଭଣ୍ଡାରା)ର ବ୍ୟବସ୍ଥା କରାଯାଇଛି।
ଗ୍ରାମବାସୀଙ୍କ ସୂଚନା ଅନୁଯାୟୀ, ଗତକାଲିଠାରୁ ଆରମ୍ଭ ହୋଇଥିବା ଏହି ଅଖଣ୍ଡ ନାମ ଯଜ୍ଞ ଆସନ୍ତା -ଗୁରୁବାର ପୂର୍ଣ୍ଣାହୁତି- ସହିତ ଉଦ୍‌ଯାପିତ ହେବ। ଏହି କାର୍ଯ୍ୟକ୍ରମକୁ ନେଇ ସ୍ଥାନୀୟ ଅଞ୍ଚଳରେ ଉତ୍ସାହ ଓ ଭକ୍ତିର ଜୁଆର ଖେଳିଯାଇଛି।