ଖଡ଼ିଆଳ ସ୍ୱୟଂଶାସିତ ମହାବିଦ୍ୟାଳୟରେ ଭାବବିହ୍ୱଳ ବିଦାୟ ସମ୍ବର୍ଦ୍ଧନା : ଚାରି ଅଧ୍ୟାପକ-ଅଧ୍ୟାପିକାଙ୍କୁ ଶୁଭେଚ୍ଛା ସହ ସମ୍ମାନଜନକ ବିଦାୟ।

ନୂଆପଡ଼ା – ୨୯/୭ – ଖଡ଼ିଆଳ ସ୍ୱୟଂଶାସିତ ମହାବିଦ୍ୟାଳୟରେ ଅଧ୍ୟକ୍ଷ ପ୍ରଫେସର ପ୍ରଶାନ୍ତ କୁମାର ପଣ୍ଡାଙ୍କ ସଭାପତିତ୍ୱରେ ସ୍ଥାନାନ୍ତରିତ ଚାରିଜଣ ଅଧ୍ୟାପକ-ଅଧ୍ୟାପିକାଙ୍କୁ ଉଦ୍ଦେଶ୍ୟ କରି ଏକ ଭାବପୂର୍ଣ୍ଣ ବିଦାୟ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇଛି। ମହାବିଦ୍ୟାଳୟ ପରିବାର ପକ୍ଷରୁ ସେମାନଙ୍କର ଶିକ୍ଷା, ଗବେଷଣା ଓ ଅନୁଷ୍ଠାନର ସାର୍ବିକ ବିକାଶ ପ୍ରତି ଅବଦାନକୁ ଉଚ୍ଚ ପ୍ରଶଂସା କରାଯାଇଥିଲା।
ସ୍ଥାନାନ୍ତର ଆଦେଶ ଅନୁଯାୟୀ ଇତିହାସ ବିଭାଗର ଅଧ୍ୟାପକ ଚିତ୍ତରଞ୍ଜନ ଜେନା ଏକାମ୍ର ମହାବିଦ୍ୟାଳୟ, ଭୁବନେଶ୍ୱର, ଓଡ଼ିଆ ବିଭାଗର ଅଧ୍ୟାପକ ଡ଼. ସୁରଞ୍ଜନ ପ୍ରଧାନ ପ୍ରାଣନାଥ ମହାବିଦ୍ୟାଳୟ, ଖୋର୍ଦ୍ଧା, ଓଡ଼ିଆ ବିଭାଗର ଅଧ୍ୟାପିକା ଡ଼. କାଜଲ ମେହେର ଜବାହର ମହାବିଦ୍ୟାଳୟ, ପଟଣାଗଡ଼ ଏବଂ ଅର୍ଥନୀତି ବିଭାଗର ଅଧ୍ୟାପକ ମୌସମ ପ୍ରଧାନ ଲୋଇସିଂହା ମହାବିଦ୍ୟାଳୟ, ବଲାଙ୍ଗୀରକୁ ବଦଳି ହୋଇଛନ୍ତି।
ଏହି ଅବସରରେ ପରୀକ୍ଷା ନିୟନ୍ତ୍ରକ ଡ଼. ରଣବୀର ସିଂହ, ପ୍ରଶାସନିକ ସହଯୋଗୀ ସୁନିଲ କୁମାର ପାଢୀ, କର୍ମଚାରୀ ସଂଘର ସମ୍ପାଦିକା ଡ଼. ଗୀତାଶ୍ରୀ ପ୍ରିୟମ୍ବଦା, ସହ ସମ୍ପାଦକ ଡ଼. ରାଜ କୁମାର ରତେଙ୍କ ସମେତ ମହାବିଦ୍ୟାଳୟର ସମସ୍ତ ଅଧ୍ୟାପକ, ଅଧ୍ୟାପିକା ଓ କର୍ମଚାରୀମାନେ ବିଦାୟୀ ଶିକ୍ଷକ-ଶିକ୍ଷୟିତ୍ରୀଙ୍କୁ ପୁଷ୍ପଗୁଚ୍ଛ, ପ୍ରୀତି ଉପହାର ଓ ଶୁଭେଚ୍ଛା ଜଣାଇ ସମ୍ମାନିତ କରିଥିଲେ।
ବିଦାୟୀ ଚାରିଜଣ ଅଧ୍ୟାପକ-ଅଧ୍ୟାପିକା ଖଡ଼ିଆଳ ମହାବିଦ୍ୟାଳୟରେ କାର୍ଯ୍ୟକାଳ ମଧ୍ୟରେ ଲାଭ କରିଥିବା ଅଭିଜ୍ଞତା, ସହକର୍ମୀଙ୍କ ସହ ସମ୍ପର୍କ ଓ ଛାତ୍ରଛାତ୍ରୀଙ୍କ ସ୍ନେହକୁ ସ୍ମରଣ କରି ଭାବବିହ୍ୱଳ ଅନୁଭୂତି ପ୍ରକାଶ କରିଥିଲେ।
ଶେଷରେ ଅଧ୍ୟକ୍ଷ ପ୍ରଫେସର ପ୍ରଶାନ୍ତ କୁମାର ପଣ୍ଡା ସମସ୍ତଙ୍କୁ ଧନ୍ୟବାଦ ଜଣାଇବା ସହ ବିଦାୟୀ ଅଧ୍ୟାପକ-ଅଧ୍ୟାପିକାଙ୍କ ନୂତନ କର୍ମସ୍ଥଳରେ ସଫଳ, ସମୃଦ୍ଧ ଓ ଉଜ୍ଜ୍ୱଳ ବୃତ୍ତିଗତ ଜୀବନ ପାଇଁ ଆନ୍ତରିକ ଶୁଭେଚ୍ଛା ଜଣାଇଥିଲେ।