ଜନଜାତି ଗୌରବ କରିଡର : ପଶ୍ଚିମ ଓଡ଼ିଶାର ବିକାଶ ପାଇଁ ସାଜିବ ‘ଲାଇଫ୍ ଲାଇନ୍’, ସାଂସଦଙ୍କ ବଡ଼ ଦାବି ।

ନୂଆପଡ଼ା – ୨୨/୪- ଓଡ଼ିଶାର ରେଳ ମାନଚିତ୍ରରେ ଏକ ବଡ଼ ପରିବର୍ତ୍ତନ ଆସିବାକୁ ଯାଉଛି। କେନ୍ଦ୍ର ସରକାରଙ୍କ ‘ଜନଜାତି ଗୌରବ କରିଡର’ ପରିକଳ୍ପନା ଏବେ ନୂଆପଡ଼ା, କଳାହାଣ୍ଡି ଏବଂ ବଲାଙ୍ଗିର ଜିଲ୍ଲା ପାଇଁ ବିକାଶର ନୂଆ ଦିଗନ୍ତ ଉନ୍ମୋଚନ କରିବାକୁ ପ୍ରସ୍ତୁତ। ବିଶେଷ କରି ନୂଆପଡ଼ା- କୋମନା -ଖଡ଼ିଆଳ ଏବଂ ବଲାଙ୍ଗିର- ପାଟଣାଗଡ଼ – କଣ୍ଟାବାଞ୍ଜି- ଖଡ଼ିଆଳ- ଧର୍ମଗଡ଼ ରେଳ ପ୍ରକଳ୍ପ ଏହି ଅଞ୍ଚଳର ଆର୍ଥିକ ଓ ସାମାଜିକ ମେରୁଦଣ୍ଡ ସାଜିବ ବୋଲି ଆଶା କରାଯାଉଛି।
ସମସ୍ତ ୩୦ ଜିଲ୍ଲାକୁ ରେଳ ସଂଯୋଗର ଲକ୍ଷ୍ୟ ରହିଛି।
ଓଡ଼ିଶାର ୩୦ଟି ଜିଲ୍ଲା ମଧ୍ୟରୁ ବର୍ତ୍ତମାନ ସୁଦ୍ଧା ୨୬ଟି ଜିଲ୍ଲା ରେଳପଥ ଦ୍ୱାରା ସଂଯୋଗ ହୋଇଥିବା ବେଳେ, ଆଗାମୀ ଦିନରେ ସମସ୍ତ ୩୦ ଟି ଜିଲ୍ଲାକୁ ରେଳପଥ ସହ ଯୋଡ଼ାଯିବ ବୋଲି କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ସୂଚନା ଦେଇଛନ୍ତି। ନୂଆପଡ଼ା ଜିଲ୍ଲାରେ ବର୍ତ୍ତମାନ ସୀମିତ ରେଳ ସୁବିଧା ଥିବାରୁ, ଏହି ନୂତନ ପ୍ରକଳ୍ପଗୁଡ଼ିକ ଜିଲ୍ଲାବାସୀଙ୍କ ଦୀର୍ଘଦିନର ସ୍ୱପ୍ନକୁ ସାକାର କରିବ।
କଳାହାଣ୍ଡି ସାଂସଦ ଶ୍ରୀମତୀ ମାଳବିକା ଦେବୀ ସଂସଦରେ ନିଜ ନିର୍ବାଚନ ମଣ୍ଡଳୀ ପାଇଁ ୧୯ ଟି ରେଳ ପ୍ରକଳ୍ପ ର ଦାବି ଉପସ୍ଥାପନ କରିଛନ୍ତି। ତାଙ୍କର ପ୍ରମୁଖ ଦାବି ଗୁଡ଼ିକ ହେଲା :
ପୂର୍ବରୁ ୪୧୧ କିମି ଥିବା ଜନଜାତି ଗୌରବ କରିଡରକୁ ଆହୁରି ୨୦୫ କିମି ସମ୍ପ୍ରସାରଣ କରି ସମୁଦାୟ ୬୧୬ କିମି କରିବାକୁ ପ୍ରସ୍ତାବ।
ନୂତନ ସଂଯୋଗ ରେ ଧର୍ମଗଡ଼ ରୁ ଖଡ଼ିଆଳ ଦେଇ ନୂଆପଡ଼ା (୧୧୦ କିମି) ଏବଂ ଖଡ଼ିଆଳରୁ ପାଟଣାଗଡ଼ ଦେଇ ବଲାଙ୍ଗିର (୯୫ କିମି) ପର୍ଯ୍ୟନ୍ତ ରେଳପଥ ନିର୍ମାଣ ଦାବି କରିଥିଲେ।
ଏହି କରିଡର ଓଡ଼ିଶା, ଛତିଶଗଡ଼ ଏବଂ ଆନ୍ଧ୍ରପ୍ରଦେଶକୁ ସିଧାସଳଖ ଯୋଡ଼ିବ।
ସାଂସଦଙ୍କ ମତରେ, ଖଡ଼ିଆଳ ବିଧାନସଭା କ୍ଷେତ୍ରରେ ବର୍ତ୍ତମାନ ସୁଦ୍ଧା ରେଳ ସୁବିଧା ନାହିଁ। ତେଣୁ ଖଡ଼ିଆଳକୁ ଏହି ନେଟୱର୍କରେ ସାମିଲ କରିବା ତାଙ୍କର ପ୍ରାଥମିକତା। ଏହି ପ୍ରକଳ୍ପ କାର୍ଯ୍ୟକାରୀ ହେଲେ ନୂଆପଡ଼ା, ଖଡ଼ିଆଳ, ଧର୍ମଗଡ଼, ଜୁନାଗଡ଼, ଭବାନୀପାଟଣା, ନର୍ଲା ଏବଂ ଲାଞ୍ଜିଗଡ଼ ଭଳି ଅଞ୍ଚଳ ରେଳ ମାନଚିତ୍ରରେ ପ୍ରମୁଖ ସ୍ଥାନ ପାଇବେ।ଏହି ରେଳ ପ୍ରକଳ୍ପ ୩ଟି ରାଜ୍ୟକୁ ସିଧାସଳଖ ଓଡ଼ିଶା ଛତିଶଗଡ଼ ଓ ଆନ୍ଧ୍ରପ୍ରଦେଶକୁ ସଂଯୋଗ କରିବ । ଅର୍ଥନୈତିକ, ରାଜନୈତିକ, ସାମାଜିକ, ବାଣିଜ୍ୟ କ୍ଷେତ୍ରରେ ବିକଶିତ ଭାରତ ବିକଶିତ ଓଡ଼ିଶାକୁ ସାଫଲ୍ୟ ମଣ୍ଡିତ କରିବ। ଖଡ଼ିଆଳ ଅଞ୍ଚଳ ସହ କଳାହାଣ୍ଡି, ବଲାଙ୍ଗିର ଲୋକସଭା କ୍ଷେତ୍ରର ସମସ୍ତ ଅଞ୍ଚଳବାସୀଙ୍କ ବହୁ ଏହା ପ୍ରତୀକ୍ଷିତ ଦାବି I କେନ୍ଦ୍ର ଜନଜାତି ଗୌରବ କରିଡର୍ ରେଳ ପରିଯୋଜନା ଭାରତ ସରକାରଙ୍କ ବିଭିନ୍ନ କ୍ଷେତ୍ରର ଜୀବନ ରେଖା ପାଲଟିବ ବୋଲି ଖଡ଼ିଆଳ ବିକାଶ ମଞ୍ଚ ସମ୍ପାଦକ ତପନ ଦାସ ପ୍ରକାଶ କରିଛନ୍ତି ।
ଏହି ଐତିହାସିକ ପ୍ରକଳ୍ପକୁ ନେଇ କଳାହାଣ୍ଡି, ନୂଆପଡ଼ା ଏବଂ ବଲାଙ୍ଗିର ଜିଲ୍ଲାବାସୀଙ୍କ ମଧ୍ୟରେ ପ୍ରବଳ ଉତ୍ସାହ ଦେଖାଦେଇଛି। ଡବଲ ଇଞ୍ଜିନ ସରକାରଙ୍କ ବିକାଶ ଧାରାରେ ଏହି ଅଞ୍ଚଳର ଚେହେରା ବଦଳିବ ବୋଲି ବୁଦ୍ଧିଜୀବୀମାନେ ମତ ପ୍ରକାଶ କରିଛନ୍ତି। କେନ୍ଦ୍ର ଓ ରାଜ୍ୟ ସରକାରଙ୍କ ମିଳିତ ସହଯୋଗରେ ଏହି କାର୍ଯ୍ୟ ତ୍ୱରାନ୍ୱିତ କରିବାକୁ ସାଧାରଣରେ ଦାବି ହେଉଛି।