ଜିଲ୍ଲା ପରିବେଶ ନିରୀକ୍ଷଣ ସମିତି ବୈଠକ ଅନୁଷ୍ଠିତ।

ନୂଆପଡ଼ା -୧୭/୦୨(ମାରାଗୁଡ଼ା ଏକ୍ସପ୍ରେସ)
ନୂଆପଡ଼ା ଜିଲ୍ଲାରେ ତୃତୀୟ ଜିଲ୍ଲା ସ୍ତରୀୟ ପରିବେଶ ନିରୀକ୍ଷଣ ସମିତି ବୈଠକ ଜିଲ୍ଲାପାଳ ମଧୁସୂଦନ ଦାଶଙ୍କ ଅଧ୍ୟକ୍ଷତାରେ ଜିଲ୍ଲାପାଳଙ୍କ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି। ଓଡିଶା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ, ବଲାଙ୍ଗୀର ଶାଖାର ଆଞ୍ଚଳିକ ଅଧିକାରୀ ଓ ପରିବେଶ ଯନ୍ତ୍ରୀ ବବିତା ସିଂଙ୍କ ଆବାହକତ୍ୱରେ ବୈଠକ ଅନୁଷ୍ଠିତ ହୋଇଥିଲା।
ସମସ୍ତଙ୍କୁ ସ୍ୱାଗତ କରି ଶ୍ରୀମତୀ ସିଂ ଗତ ଜିଲ୍ଲା ସ୍ତରୀୟ ପରିବେଶ ନିରୀକ୍ଷଣ ସମିତି ବୈଠକରେ ଆଲୋଚିତ ବିଭିନ୍ନ ବିଷୟରେ ସମ୍ବନ୍ଧିତ ବିଭାଗମାନଙ୍କ ଦ୍ୱାରା ଗୃହୀତ ପଦକ୍ଷେପ ଉପରେ ବିସ୍ତୃତ ଆଲୋକପାତ କରିଥିଲେ। ସେ କହିଥିଲେ ଯେ, କୋମନା ଅଞ୍ଚଳରେ ଷ୍ଟୋନ୍ କ୍ରସର ଇଉନିଟ୍‌ ଗୁଡ଼ିକର ସଂଯୁକ୍ତ ନିରୀକ୍ଷଣ ଏସପିସିବି ବଲାଙ୍ଗୀର ଓ ଖଣି ବିଭାଗ ପକ୍ଷରୁ କରାଯାଇଛି। ସେହିପରି ଜିଲ୍ଲାର ରାଇସ୍‌ ମିଲ୍‌ଗୁଡ଼ିକର ନିୟମିତ ଯାଞ୍ଚ କରାଯାଇ ନିୟମ ଉଲ୍ଲଂଘନ କରୁଥିବା ମିଲ୍ ଗୁଡ଼ିକ ବିରୋଧରେ ଆବଶ୍ୟକ ପଦକ୍ଷେପ ଗ୍ରହଣ କରାଯାଉଛି।
ଏହା ସହିତ ନୂଆପଡ଼ା ଓ ଖରିଆର ରୋଡ୍‌ ଅଞ୍ଚଳରେ ଚାଲୁଥିବା ହୋଟେଲ୍‌ ଗୁଡ଼ିକର ନିରୀକ୍ଷଣ ମଧ୍ୟ ଏସପିସିବି ବଲାଙ୍ଗୀର ପକ୍ଷରୁ ସମ୍ପୂର୍ଣ୍ଣ କରାଯାଇଛି। ପତୋରା ଡ୍ୟାମ୍‌, ତିଖାଲି ଡ୍ୟାମ୍‌ ସହ ବିଭିନ୍ନ ପିକନିକ୍‌ ସ୍ଥଳରେ ‘ସିଙ୍ଗଲ୍‌ ୟୁଜ୍‌ ପ୍ଲାଷ୍ଟିକ୍‌ ମୁକ୍ତ ପିକନିକ୍‌ ସ୍ପଟ୍‌’ ସନ୍ଦେଶ ସହ ସାମୂହିକ ସଫାଇ ଅଭିଯାନ ମାଧ୍ୟମରେ ସଚେତନତା କାର୍ଯ୍ୟକ୍ରମ ଆୟୋଜନ କରାଯାଇଛି।
ବୈଠକକୁ ସମ୍ବୋଧିତ କରି ଜିଲ୍ଲାପାଳ କହିଲେ ଯେ, ପ୍ରଦୂଷଣ ନିୟନ୍ତ୍ରଣ ଓ ପରିବେଶ ସୁରକ୍ଷା ପାଇଁ ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ପ୍ରକାର ସହଯୋଗ ଜାରି ରହିବ। ସିଙ୍ଗଲ୍‌ ୟୁଜ୍‌ ପ୍ଲାଷ୍ଟିକ୍‌ ବ୍ୟବହାର ବନ୍ଦ କରିବା ପାଇଁ ଲୋକମାନଙ୍କ ମଧ୍ୟରେ ବ୍ୟାପକ ସଚେତନତା ଆବଶ୍ୟକ । ସେ କହିଲେ ” ଗାଁ ପରିମଳ ଗାଁ ମୁଣ୍ଡରୁ ” l ଏଥିପାଇଁ ଗ୍ରାମାଞ୍ଚଳରେ ପରିବେଶ ସ୍ୱଚ୍ଛତା ରକ୍ଷା ପାଇଁ ସମଗ୍ର ଜିଲ୍ଲାରେ ପ୍ଲାଷ୍ଟିକ ବର୍ଜ୍ୟ ସଂଗ୍ରହ ଅଭିଯାନ ତୀବ୍ର କରିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ।
ଏହା ସହିତ ଆସନ୍ତା ୨୦ ତାରିଖରେ ପୁଲିସ୍‌ ଗ୍ରାଉଣ୍ଡରେ ‘ସିଙ୍ଗଲ୍‌ ୟୁଜ୍‌ ପ୍ଲାଷ୍ଟିକ୍‌କୁ ନା’ ବିଷୟବସ୍ତୁ ଉପରେ ‘ରାହାଗିରି’ କାର୍ଯ୍ୟକ୍ରମ ଆୟୋଜନ କରିବାକୁ ଜିଲ୍ଲାପାଳ ପ୍ରସ୍ତାବ ଦେଇଥିଲେ। ।ବୈଠକରେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡାଃ ଧନେଶ୍ୱର ସେଠୀ, ଏସ ଡି ପି ଓ ମାର୍ଶୀ ରାଣୀ ପୁର୍ତୀ, ଜିଲ୍ଲା ଶିଳ୍ପ କେନ୍ଦ୍ର ଜେନେରାଲ୍‌ ମ୍ୟାନେଜର ସମୀର ମୁଦୁଲି, ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଏ.କେ. ହେମ୍ବ୍ରମ, ଆର୍ ଟି ଓ ଶର୍ମିଲା ମହାରଣା, ପର୍ଦ୍ଦା ଏନ୍ ଜି ଓ ନିର୍ଦ୍ଦେଶକ ରୁଦ୍ର ପଟ୍ଟନାୟକ, ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ବିଦ୍ୟାପତି ପଣ୍ଡା, ଆସିଷ୍ଟାଣ୍ଟ ପରିବେଶ ଇଞ୍ଜିନିୟର ତରଶ୍‌ ଏମ୍‌ ମୁର୍ମୁ, ଏନ୍ ଏ ସି ନୂଆପଡା ଇ ଓ ,ସନ୍ଦୀପ କୁମାର ଚନ୍ଦ୍ରକାର ,ଏନ୍ ଏ ସି ଖରିଆର ରୋଡ ଇ ଓ, କମଳାସନ ରଥ ଙ୍କ ସହିତ ବିଭିନ୍ନ ବିଭାଗୀୟ ଅଧିକାରୀ ଉପସ୍ଥିତ ଥିଲେ।