ନୂଆପଡ଼ାରେ ଜନଗଣନା–୨୦୨୭ ର ଶୁଭାରମ୍ଭ : ଡିଜିଟାଲ ପ୍ରଣାଳୀରେ ଆରମ୍ଭ ହେଲା ଗୃହ ତାଲିକା ପ୍ରସ୍ତୁତି।

ନୂଆପଡ଼ା- ୧୭/୦୪- ଦେଶର ବୃହତ୍ତମ ଜାତୀୟ ଅଭିଯାନ ‘ଜନଗଣନା–୨୦୨୭’ ର ପ୍ରଥମ ପର୍ଯ୍ୟାୟ ନୂଆପଡ଼ା ଜିଲ୍ଲାରେ ସଫଳତାର ସହ ଆରମ୍ଭ ହୋଇଛି। ଜନସାଧାରଣଙ୍କ ପାଇଁ ସ୍ୱୟଂ-ଗଣନା ପ୍ରକ୍ରିୟା ଶେଷ ହେବା ପରେ, କ୍ଷେତ୍ରସ୍ତରରେ ଗୃହ ତାଲିକା ଓ ଗୃହ ଗଣନା କାର୍ଯ୍ୟ ଆରମ୍ଭ କରାଯାଇଛି।
ଜିଲ୍ଲାର ୫ ଟି ଗ୍ରାମୀଣ ଓ ୩ ଟି ସହରୀ ଚାର୍ଜ ଅଫିସ ଅଧୀନରେ ଏହି ଗଣନା ପ୍ରକ୍ରିୟା ଜାରି ରହିଛି। ଏହି କାର୍ଯ୍ୟକୁ ସୁଚାରୁଭାବେ ସମ୍ପାଦନ କରିବା ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ୧,୧୩୮ ଜଣ ଗଣନାକାରୀ ଏବଂ ୧୯୪ ଜଣ ପର୍ଯ୍ୟବେକ୍ଷକ।
ଆପତ୍କାଳୀନ ସ୍ଥିତି ପାଇଁ ୧୦ ପ୍ରତିଶତ ଅତିରିକ୍ତ କର୍ମଚାରୀଙ୍କୁ ପ୍ରସ୍ତୁତ ରଖାଯାଇଛି।
ଗତ କାଲି ଅପରାହ୍ନ ୪:୩୦ ସୁଦ୍ଧା ଜିଲ୍ଲାରେ ୧୪,୬୮୪ଟି ଗୃହ ତାଲିକାଭୁକ୍ତ ହୋଇଥିବାବେଳେ ୧୬,୬୪୭ଟି ଜନଗଣନା ଘର ଚିହ୍ନଟ କରାଯାଇଛି।
ଚଳିତ ଜନଗଣନାର ସବୁଠାରୁ ବଡ଼ ବିଶେଷତ୍ୱ ହେଉଛି ଏହାର ଡିଜିଟାଲ ରୂପରେଖ। କୌଣସି କାଗଜ କଲମ ବଦଳରେ ସ୍ୱତନ୍ତ୍ର ମୋବାଇଲ୍ ଆପ୍ ଏବଂ ସିଏମଏମଏସ ମାଧ୍ୟମରେ ତଥ୍ୟ ସଂଗ୍ରହ କରାଯାଉଛି। ଏହାଦ୍ୱାରା ତଥ୍ୟର ସଠିକତା ଏବଂ ଗୋପନୀୟତା ରକ୍ଷା କରାଯାଇପାରିବ। ଏହି ପ୍ରଥମ ପର୍ଯ୍ୟାୟ ଏପ୍ରିଲ ୧୬ ଠାରୁ ଆରମ୍ଭ ହୋଇ *ମେ ୧୫, ୨୦୨୬ ପର୍ଯ୍ୟନ୍ତ ଚାଲିବ। ଗଣନାକାରୀମାନେ ଘରକୁ ଘର ବୁଲି ପରିବାରର ସୁବିଧା ଓ ସମ୍ପତ୍ତି ସମ୍ପର୍କିତ ୩୩ଟି ପ୍ରଶ୍ନ* ପଚାରିବେ।ଦ୍ୱିତୀୟ ପର୍ଯ୍ୟାୟ ଜନସଂଖ୍ୟା ଗଣନା ୯ ଫେବୃଆରୀରୁ ୨୮ ଫେବୃଆରୀ, ୨୦୨୭।
ଆଧାର ମୁହୂର୍ତ୍ତ ୧ ମାର୍ଚ୍ଚ ୨୦୨୭, ରାତି ୧୨ଟା।
ଜନଗଣନା ଆଇନ, ୧୯୪୮ ଅନୁଯାୟୀ ଜନସାଧାରଣଙ୍କ ଦ୍ୱାରା ପ୍ରଦତ୍ତ ସମସ୍ତ ତଥ୍ୟ ସମ୍ପୂର୍ଣ୍ଣ ଗୋପନୀୟ ରଖାଯିବ। ଯେଉଁମାନେ ପୂର୍ବରୁ ସ୍ୱୟଂ ଗଣନା କରିଛନ୍ତି, ସେମାନେ ନିଜର ଆଇଡି ଗଣନାକାରୀଙ୍କୁ ଦେଇ ସହଯୋଗ କରିବାକୁ ଏବଂ ଅନ୍ୟମାନେ ସଠିକ ତଥ୍ୟ ପ୍ରଦାନ କରିବାକୁ ଜିଲ୍ଲା ପ୍ରଶାସନ ପକ୍ଷରୁ ନିବେଦନ କରାଯାଇଛି।