ନୂଆପଡ଼ା ରେ ଜିଲ୍ଲାସ୍ତରୀୟ କୃଷି କର୍ମଶାଳା : ‘ବିକାଶର ଧାରା, ଓଡ଼ିଶା ସାରା’ ଅଭିଯାନ ରେ ଜୈବିକ ଚାଷକୁ ଗୁରୁତ୍ୱ।

ନୂଆପଡ଼ା- ୧୮/୬- ଓଡ଼ିଶା ସାରା ଏବେ ପ୍ରଗତିର ନୂଆ ସ୍ୱର। ରାଜ୍ୟ ସରକାରଙ୍କ ସଫଳ ଦୁଇ ବର୍ଷ ପୂର୍ତ୍ତି ଅବସରରେ ଆରମ୍ଭ ହୋଇଥିବା ଜନସମ୍ପର୍କ କାର୍ଯ୍ୟକ୍ରମ ‘ବିକାଶର ଧାରା, ଓଡ଼ିଶା ସାରା’ ଅନ୍ତର୍ଗତ ଆଜି ନୂଆପଡ଼ାଠାରେ ଏକ ବୃହତ ଜିଲ୍ଲାସ୍ତରୀୟ କୃଷି କର୍ମଶାଳା ସଫଳତାର ସହ ଅନୁଷ୍ଠିତ ହୋଇଯାଇଛି। ସ୍ଥାନୀୟ ନ୍ୟାସନାଲ କଲେଜ ଅଡିଟୋରିୟମରେ ଆୟୋଜିତ ଏହି କାର୍ଯ୍ୟକ୍ରମରେ ଜୈବିକ ଚାଷ ଏବଂ ପ୍ରଗତିଶୀଳ କୃଷି ପ୍ରଣାଳୀ ଉପରେ ବିଶେଷ ଗୁରୁତ୍ୱ ଦିଆଯାଇଥିଲା। ଜିଲ୍ଲାପାଳ ମଧୁସୂଦନ ଦାଶ ଏହି ସମାବେଶରେ ଅଧ୍ୟକ୍ଷତା କରିଥିଲେ।
କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ନୂଆପଡ଼ା ବ୍ଲକ ଅଧ୍ୟକ୍ଷା ତାରେଶ୍ୱରୀ ସାହୁ, ଉପାଧ୍ୟକ୍ଷ ଦିଲୀପ ନିର୍ମଳକର ଏବଂ ଜିଲ୍ଲା କୃଷକ ମୋର୍ଚ୍ଚା ସଭାପତି ରତନଲାଲ ଚନ୍ଦ୍ରକାର ପ୍ରମୁଖ ଯୋଗ ଦେଇଥିଲେ। ଏହା ସହ ବିଭିନ୍ନ ବିଭାଗର ବରିଷ୍ଠ ଅଧିକାରୀ, ଗଣମାଧ୍ୟମ ପ୍ରତିନିଧି ଏବଂ ଶତାଧିକ ପ୍ରଗତିଶୀଳ ଚାଷୀ ଓ କୃଷି ଉଦ୍ୟୋଗୀ ଏଥିରେ ସାମିଲ ହୋଇଥିଲେ।
ଏହି ଉଚ୍ଚସ୍ତରୀୟ କର୍ମଶାଳାରେ ଆଧୁନିକ କୃଷିର ସମସ୍ୟା ଓ ସମାଧାନ ନେଇ ବିସ୍ତୃତ ବ୍ଲୁ-ପ୍ରିଣ୍ଟ ପ୍ରସ୍ତୁତ କରାଯାଇଥିଲା। ମୁଖ୍ୟତଃ ନିମ୍ନଲିଖିତ ପ୍ରସଙ୍ଗ ଉପରେ ବିଶେଷଜ୍ଞମାନେ ଆଲୋକପାତ କରିଥିଲେ।
ମୃତ୍ତିକା ଓ ଜଳ ସଂରକ୍ଷଣ : ମାଟିର ଉର୍ବରତା ବଜାୟ ରଖିବା ସହ ଜଳର ସଦୁପଯୋଗ କରିବା।
କୀଟନାଶକ ରୁ ମୁକ୍ତି : ରାସାୟନିକ ସାର ଓ ବିଷାକ୍ତ କୀଟନାଶକ ଉପରେ ନିର୍ଭରଶୀଳତା କମାଇବା।
ଜଳବାୟୁ ଅନୁକୂଳ ଚାଷ : ବଦଳୁଥିବା ପାଣିପାଗକୁ ସାମ୍ନା କଲାଭଳି ବୈଜ୍ଞାନିକ ପଦ୍ଧତି ଆପଣାଇବା।
ସରକାରୀ ଯୋଜନାର ସୁଫଳ : ଉଦ୍ୟାନ କୃଷି, ପ୍ରାଣୀ ସମ୍ପଦ, ମତ୍ସ୍ୟ ଏବଂ ଜଳବିଭାଜିକା ବିକାଶ ବିଭାଗର ବିଭିନ୍ନ ଲାଭଦାୟକ ଯୋଜନା ବିଷୟରେ ଚାଷୀଙ୍କୁ ଅବଗତ କରାଯାଇଥିଲା।

ସମାବେଶକୁ ସମ୍ବୋଧିତ କରି ଜିଲ୍ଲାପାଳ ମଧୁସୂଦନ ଦାଶ ଚାଷୀମାନଙ୍କୁ ଉତ୍ସାହିତ କରିବା ସହ ଏକ ବଡ଼ ମନ୍ତ୍ର ଦେଇଛନ୍ତି।
“ଜିଲ୍ଲା ପ୍ରଶାସନ ଚାଷୀମାନଙ୍କର, ଚାଷୀମାନଙ୍କ ପାଇଁ ଏବଂ ଚାଷୀମାନଙ୍କ ଦ୍ୱାରା। ଜିଲ୍ଲାର କୃଷି ଓ କୃଷକଙ୍କ ସାମଗ୍ରିକ ବିକାଶ ପାଇଁ ଆମେ ସଦା ପ୍ରତିବଦ୍ଧ। ଆସନ୍ତୁ, ଆମେ ମିଳିମିଶି ଜୈବିକ ଚାଷ କରିବା ଓ ମୃତ୍ତିକାର ସ୍ୱାସ୍ଥ୍ୟ ଭଲ ରଖିବା।” ବୋଲି ଜିଲ୍ଲାପାଳ କହିଛନ୍ତି।
ସେ ଆହୁରି ଉତ୍ସାହିତ କରି ଚାଷୀମାନ ଙ୍କୁ କେବଳ ଧାନ ଚାଷରେ ସୀମିତ ନରହି ରବି ଋତୁରେ ଡାଲି, ତୈଳବୀଜ ଏବଂ ପନିପରିବା ଭଳି ଅଣଧାନ ଫସଲ କରି ନିଜର ଆୟ ଦ୍ୱିଗୁଣିତ କରିବାକୁ ଆହ୍ୱାନ ଦେଇଛନ୍ତି। ଏହା ସହ ରାସାୟନିକ ସାର ବଦଳରେ ‘ନାନୋ ୟୁରିଆ’ ବ୍ୟବହାର କରିବାକୁ ସେ ପରାମର୍ଶ ଦେଇଛନ୍ତି।ଏହି ଅବସରରେ ପ୍ରଶାସନ ପକ୍ଷରୁ କୃଷକମାନଙ୍କ ସ୍ୱାର୍ଥ ରକ୍ଷା ପାଇଁ ଏକ ବଡ଼ ପଦକ୍ଷେପ ସ୍ୱରୂପ ‘ମୃତ୍ତିକା ସ୍ୱାସ୍ଥ୍ୟ କାର୍ଡ’ ବଣ୍ଟନ କରାଯାଇଥିଲା। ଏହା ସହିତ କୃଷି କ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରିଥିବା ଜିଲ୍ଲାର କୃତୀ ଓ ପ୍ରଗତିଶୀଳ ଚାଷୀମାନଙ୍କୁ ମଞ୍ଚରେ ସମ୍ବର୍ଦ୍ଧିତ କରାଯାଇ ସେମାନଙ୍କର ମନୋବଳ ବୃଦ୍ଧି କରାଯାଇଥିଲା।
ଏହି କର୍ମଶାଳା ଆଗାମୀ ଦିନରେ ନୂଆପଡ଼ା ଜିଲ୍ଲାରେ ଏକ ସବୁଜ ବିପ୍ଳବ ଏବଂ ଜୈବିକ ଚାଷର ଏକ ନୂଆ ଅଧ୍ୟାୟ ସୃଷ୍ଟି କରିବ ବୋଲି ଆଶା କରାଯାଉଛି।