ନୂଆପଡ଼ା ରେ ବିକାଶ କାର୍ଯ୍ୟର ସମୀକ୍ଷା : ବିଭିନ୍ନ ଉନ୍ନୟନମୂଳକ ପ୍ରକଳ୍ପ ବୁଲି ଦେଖିଲେ ମୃତ୍ତିକା ସଂରକ୍ଷଣ ନିର୍ଦ୍ଦେଶକ।

ନୂଆପଡ଼ା- ୧୮/୦୭- ନୂଆପଡ଼ା ଜିଲ୍ଲାରେ କୃଷି, ମୃତ୍ତିକା ସଂରକ୍ଷଣ ଓ ଜଳସଂରକ୍ଷଣ ଭଳି ଗୁରୁତ୍ୱପୂର୍ଣ୍ଣ ଯୋଜନାର ଅଗ୍ରଗତି ପରଖିଛନ୍ତି ଉଚ୍ଚପଦସ୍ଥ ଅଧିକାରୀ। ଦୁଇ ଦିନିଆ ନୂଆପଡ଼ା ଜିଲ୍ଲା ଗସ୍ତରେ ଆସିଥିବା ମୃତ୍ତିକା ସଂରକ୍ଷଣ ଓ ଜଳଭିଭାଜିକା ବିକାଶ ନିର୍ଦ୍ଦେଶକ ସୁବ୍ରତ କୁମାର ପଣ୍ଡା ଆଜି ଖରିଆର ବ୍ଲକର ବିଭିନ୍ନ ପଞ୍ଚାୟତ ପରିଦର୍ଶନ କରିଛନ୍ତି। ଏହି ଅବସରରେ ସେ ମୃତ୍ତିକା ସଂରକ୍ଷଣ, ଜଳସଂରକ୍ଷଣ, କୃଷି ଓ ଜୀବିକାଭିତ୍ତିକ ବିଭିନ୍ନ ଉନ୍ନୟନମୂଳକ କାର୍ଯ୍ୟର ଅଗ୍ରଗତି ସମୀକ୍ଷା କରିବା ସହ ହିତାଧିକାରୀଙ୍କ ସହ ସିଧାସଳଖ ଆଲୋଚନା କରିଛନ୍ତି।
ମହିଳା ସ୍ୱୟଂ ସହାୟକ ଗୋଷ୍ଠୀ ସହ ଆଲୋଚନା ଓ ଚାରା ରୋପଣ।
ଗସ୍ତ ଅବସରରେ ନିର୍ଦ୍ଦେଶକ ଶ୍ରୀ ପଣ୍ଡା ପ୍ରଥମେ ଦାବରୀ ପଞ୍ଚାୟତର ଭୈରାଜପୁର ଗ୍ରାମକୁ ଯାଇଥିଲେ। ସେଠାରେ ପ୍ରଧାନମନ୍ତ୍ରୀ କୃଷି ଶିଞ୍ଚାୟୀ ଯୋଜନା (PMKSY) ଅଧୀନରେ ବତକ ପାଳନ ପାଇଁ ସହାୟତା ପାଇଥିବା ‘ଗୋମାତା ସ୍ୱୟଂ ସହାୟକ ଗୋଷ୍ଠୀ’ ର ସଦସ୍ୟାମାନଙ୍କ ସହ ସେ ଭାବବିନିମୟ କରିଥିଲେ। ମହିଳାମାନଙ୍କ ବାର୍ଷିକ ଆୟ, ଜୀବିକାରେ ଆସିଥିବା ସକାରାତ୍ମକ ପରିବର୍ତ୍ତନ ଏବଂ ଯୋଜନାର ସଫଳତା ସମ୍ପର୍କରେ ସେ ପଚାରି ବୁଝିଥିଲେ। ଏହି ସମୟରେ ସେ ସ୍ଥାନୀୟ ଚାଷୀ ଶରଣ ବଛାଙ୍କ ଜମିରେ ଗୋଷ୍ଠୀର ସଦସ୍ୟାମାନଙ୍କ ସହ ମିଶି ଆମ୍ବ ଓ ନଡ଼ିଆ ଚାରା ରୋପଣ କରି ପରିବେଶ ସୁରକ୍ଷା ଏବଂ ଫଳଚାଷକୁ ପ୍ରୋତ୍ସାହିତ କରିଥିଲେ।
କ୍ଷେତ ପୋଖରୀ ଓ ଜଳସଂରକ୍ଷଣ ଭିତ୍ତିଭୂମି ବୁଲି ଦେଖିଲେ।
ପରବର୍ତ୍ତୀ ପର୍ଯ୍ୟାୟରେ ନିର୍ଦ୍ଦେଶକ ଚାଷୀ ଅଜିତ ହେର୍ଣ୍ଣା ଓ ଭାସ୍କର ହେର୍ଣ୍ଣାଙ୍କ ଖେତ ପୋଖରୀ ପରିଦର୍ଶନ କରିବା ସହ ‘ନାରୀଶକ୍ତି ସ୍ୱୟଂ ସହାୟକ ଗୋଷ୍ଠୀ’ ଦ୍ୱାରା ପରିଚାଳିତ କୁକୁଡ଼ା ପାଳନ ପ୍ରକଳ୍ପ ବୁଲି ଦେଖିଥିଲେ। ଏଥିସହ ଚାଷ ଜମିରେ ନିର୍ମିତ:
* ସ୍ପିଲୱେ (Spillway)
* ରିଂୱେଲ୍ (Ring Well)
ଅନ୍ୟାନ୍ୟ ଜଳସଂରକ୍ଷଣ ଭିତ୍ତିଭୂମିର କାର୍ଯ୍ୟର ସ୍ଥଳ ପରିଦର୍ଶନ କରି ସେ ସନ୍ତୋଷ ପ୍ରକାଶ କରିଥିଲେ।
ଏହାପରେ ସେ ଡାବରୀ ପଞ୍ଚାୟତର ଜୁଗୁରାମ ମାଝୀ, ବିରଘାଟ ପଞ୍ଚାୟତର ହୃଦୟ ଶୁନାନୀ ଏବଂ ବାଦି ପଞ୍ଚାୟତର ପ୍ରସନ୍ନ ମାଝୀଙ୍କ ଜମିରେ ‘ଜଳଧାରା ଯୋଜନା’ ଅଧୀନରେ ନିର୍ମିତ ଖେତ ପୋଖରୀ ପରିଦର୍ଶନ କରି କୃଷିରେ ଜଳ ସଂରକ୍ଷଣର ପ୍ରଭାବ ସମ୍ପର୍କରେ ଅବଗତ ହୋଇଥିଲେ।
ମନରେଗା ଆମ୍ବ ବଗିଚା ପ୍ରକଳ୍ପକୁ ପ୍ରଶଂସା।
ଗସ୍ତର ଶେଷ ପର୍ଯ୍ୟାୟରେ ଶ୍ରୀ ପଣ୍ଡା ଅରେଡା ପଞ୍ଚାୟତରେ ମନରେଗା ଯୋଜନା ରେ ସୃଷ୍ଟି ହୋଇଥିବା ୩ ହେକ୍ଟର ପରିମିତ ଆମ୍ବ ବଗିଚା ପରିଦର୍ଶନ କରିଥିଲେ। କାର୍ଯ୍ୟର ଗୁଣାତ୍ମକ ମାନ ଓ ଏହା ଦ୍ୱାରା ଆଗାମୀ ଦିନରେ ସୃଷ୍ଟି ହେବାକୁ ଥିବା ଦୀର୍ଘମିଆଦି ଜୀବିକା ସମ୍ଭାବନାକୁ ସେ ବେଶ ପ୍ରଶଂସା କରିଥିଲେ।
ଚାଷୀଙ୍କ ଆୟବୃଦ୍ଧି ଉପରେ ଗୁରୁତ୍ୱ।
ଏହି ପରିଦର୍ଶନ ସମୟରେ ସମ୍ପୃକ୍ତ ବିଭାଗର ଅଧିକାରୀମାନେ ଉପସ୍ଥିତ ରହି ବିଭିନ୍ନ ପ୍ରକଳ୍ପର କାର୍ଯ୍ୟକାରିତା ଓ ଅଗ୍ରଗତି ସମ୍ପର୍କରେ ନିର୍ଦ୍ଦେଶକଙ୍କୁ ବିସ୍ତୃତ ସୂଚନା ଦେଇଥିଲେ। ଜଳସଂରକ୍ଷଣ, ମୃତ୍ତିକା ସଂରକ୍ଷଣ ଓ ଜୀବିକାଭିତ୍ତିକ ଯୋଜନାଗୁଡ଼ିକୁ ସମନ୍ୱିତ ଭାବେ କାର୍ଯ୍ୟକାରୀ କରି କୃଷକଙ୍କ ଆୟବୃଦ୍ଧି ଏବଂ ସ୍ଥାୟୀ ଜୀବିକା ସୁନିଶ୍ଚିତ କରିବା ଉପରେ ନିର୍ଦ୍ଦେଶକ ଶ୍ରୀ ପଣ୍ଡା ସ୍ଥାନୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।