ବର୍ଷା ଜଳରେ ବୁଡ଼ିଲା ଲଖନା ରେଳୱେ ଅଣ୍ଡର ବ୍ରିଜ: ଯାତାୟାତ ବାଧାପ୍ରାପ୍ତ, ରେଳ ବିଭାଗ ସାଜିଛି ନିରବ ଦ୍ରଷ୍ଟା।

ନୂଆପଡ଼ା -୫/୭- ବର୍ଷା ଋତୁ ଆସିଲେ ବଦଳେନି ଲଖନା ଅଞ୍ଚଳବାସୀଙ୍କ ଭାଗ୍ୟ। ସମସ୍ୟା ଯେମିତି କୁ ସେମିତି। ନୂଆପଡ଼ା ଜିଲ୍ଲା କୋମନା ବ୍ଲକ୍ ଅନ୍ତର୍ଗତ ଲଖନା ରେଳୱେ ଅଣ୍ଡର ବ୍ରିଜ ରେ ଏବେ ବର୍ଷା ଜଳ ଜମି ରହିବା ଫଳରେ ସ୍ଥାନୀୟ ଜନସାଧାରଣ ନାହିଁ ନଥିବା ଦୁର୍ଦ୍ଦଶାର ସମ୍ମୁଖୀନ ହେଉଛନ୍ତି। ଗତ ଦୁଇ ଦିନର ଲଗାଣ ବର୍ଷା ଯୋଗୁଁ ଅଣ୍ଡର ବ୍ରିଜ୍‌ରେ ପ୍ରାୟ ୩ ରୁ ୪ ଫୁଟ୍ ପର୍ଯ୍ୟନ୍ତ ପାଣି ଜମି ରହିଛି, ଯାହାଦ୍ୱାରା ଏହି ରାସ୍ତାରେ ଯାତାୟାତ  ବାଧାପ୍ରାପ୍ତ ହୋଇଛି।
ସବୁଦିନିଆ ସମସ୍ୟା, ମିଛ ପ୍ରତିଶ୍ରୁତି!
ଅଣ୍ଡର ବ୍ରିଜ୍‌ର ଉଚ୍ଚତା କମ୍ ଥିବାରୁ ସାଧାରଣ ଦିନରେ ମଧ୍ୟ ବଡ଼ ଚାରିଚକିଆ ଯାନ ଗୁଡ଼ିକ ଏହା ମଧ୍ୟ ଦେଇ ଗତି କରିପାରନ୍ତି ନାହିଁ। ଆଉ ଏବେ ବର୍ଷା ଦିନେ ପାଣି ଜମି ରହିବା ଯୋଗୁଁ ସ୍ଥିତି ଆହୁରି ସଂଗୀନ ହୋଇପଡ଼ିଛି।
ବାରମ୍ବାର ଦାବି ସତ୍ତ୍ୱେ କାର୍ଯ୍ୟାନୁଷ୍ଠାନ ଶୂନ୍ୟ । ଲଖନା ଅଞ୍ଚଳବାସୀ ସମ୍ବଲପୁର ପୂର୍ବତଟ ରେଳ ଡିଭିଜନର ଡିଆରଏମ ଙ୍କୁ ବାରମ୍ବାର ଅଭିଯୋଗ କରିବା ସହ ଅନେକ ଆନ୍ଦୋଳନ କରିଛନ୍ତି।
ନିରବ ଦ୍ରଷ୍ଟା ପୂର୍ବତଟ ରେଳ ବିଭାଗ । ସମସ୍ୟାର ସ୍ଥାୟୀ ସମାଧାନ ପାଇଁ ପୂର୍ବରୁ ଅଞ୍ଚଳବାସୀ ‘ରେଳ ରୋକ’ କରି ବିଭାଗର ଦୃଷ୍ଟି ଆକର୍ଷଣ କରିଥିଲେ କିନ୍ତୁ ରେଳ ବିଭାଗ କେବଳ ନିରବ ଦ୍ରଷ୍ଟା ସାଜିଛି।
ପ୍ରଶାସନର ପ୍ରତାରଣା କହିଲେ ଅତ୍ୟୁକ୍ତି ହେବନାହିଁ। ବିଭିନ୍ନ ସମୟରେ ରେଳ ବିଭାଗର ବଡ଼ ବଡ଼ ଅଧିକାରୀମାନେ ଆସି ସ୍ଥାନୀୟ ନେତୃସ୍ଥାନୀୟ ବ୍ୟକ୍ତିବିଶେଷଙ୍କ ସହ ଆଲୋଚନା କରନ୍ତି, ହେଲେ ସେମାନଙ୍କ ପ୍ରତିଶ୍ରୁତି କେବଳ ‘ପାଣିର ଗାର’ ସଦୃଶ ସାବ୍ୟସ୍ତ ହେଉଛି।
“ଯଥା ପୂର୍ବମ୍ ତଥା ପରମ୍” – ବର୍ଷା ଛାଡ଼ିଲେ ଅଧିକାରୀଙ୍କ ପ୍ରତିଶ୍ରୁତି ଭୁଲିଯାଏ ରେଳ ବିଭାଗ, ଆଉ ବର୍ଷା ଆସିଲେ ପୁଣି ଉଗ୍ର ରୂପ ନିଏ ସମସ୍ୟା।
ରେଳ ବିଭାଗର ଏଭଳି ଉଦାସୀନ ମନୋଭାବ ପରେ ଏବେ ସ୍ଥାନୀୟ ଜନସାଧାରଣଙ୍କ ଶେଷ ଭରସା ପାଲଟିଛନ୍ତି କଳାହାଣ୍ଡି ସାଂସଦ। ଏହି ସଂଗୀନ ସମସ୍ୟା ପ୍ରତି ସାଂସଦ ମହୋଦୟ ସ୍ୱତନ୍ତ୍ର ଦୃଷ୍ଟି ଦେଇ ତୁରନ୍ତ ଏହାର ଏକ ସ୍ଥାୟୀ ସମାଧାନ ଦିଗରେ ଦୃଢ଼ ପଦକ୍ଷେପ ନେବେ ବୋଲି ଲଖନା ଅଞ୍ଚଳବାସୀ ଚାତକ ଭଳି ଚାହିଁ ରହିଛନ୍ତି।
ରାଜ୍ୟ ଓ କେନ୍ଦ୍ର ସରକାର ‘ବିକାଶ’ର ଡିଣ୍ଡିମ ପିଟୁଥିବା ବେଳେ, ଲଖନା ର ଏହି ଦୃଶ୍ୟ ପ୍ରଶାସନିକ ବ୍ୟବସ୍ଥା ଉପରେ ଏକ ବଡ଼ ପ୍ରଶ୍ନବାଚୀ ସୃଷ୍ଟି କରିଛି।