ନୂଆପଡ଼ାରେ ‘ନାରୀ ଶକ୍ତି ବନ୍ଦନ’: ସୁଭଦ୍ରା ଶକ୍ତି ମହିଳା ସଶକ୍ତିକରଣ ଶୋଭାଯାତ୍ରା ଅନୁଷ୍ଠିତ।

ନୂଆପଡ଼ା -୧୭/୪ – ନୂଆପଡ଼ା ଜିଲ୍ଲାରେ ମହିଳାଙ୍କୁ ଆର୍ଥିକ ଓ ସାମାଜିକ ସ୍ତରରେ ସୁଦୃଢ଼ କରିବା ଲକ୍ଷ୍ୟରେ ଏକ ବୃହତ ସଚେତନତା ଅଭିଯାନ ଆରମ୍ଭ ହୋଇଛି। ଜିଲ୍ଲା ପ୍ରଶାସନ ଓ ମିଶନ ଶକ୍ତି ବିଭାଗର ମିଳିତ ଆନୁକୂଳ୍ୟରେ ‘ନାରୀ ଶକ୍ତି ବନ୍ଦନ ଅଧିନିୟମ’ ଏବଂ ‘ସୁଭଦ୍ରା ଶକ୍ତି ମହିଳା ସଶକ୍ତିକରଣ’ ସଚେତନତା ଶୋଭାଯାତ୍ରା  ଜିଲ୍ଲା ମୁଖ୍ୟାଳୟରେ ଅନୁଷ୍ଠିତ ହୋଇଯାଇଛି।
ଜିଲ୍ଲାପାଳ ମଧୁସୁଦନ ଦାଶ ମୁଖ୍ୟାଳୟ ପରିସରରେ ସବୁଜ ପତାକା ଦେଖାଇ ଏହି ଶୋଭାଯାତ୍ରାର ଶୁଭାରମ୍ଭ କରିଥିଲେ। ଏଥିରେ ଶତାଧିକ ସ୍ୱୟଂ ସହାୟକ ଗୋଷ୍ଠୀ ର ସଦସ୍ୟା, କମ୍ୟୁନିଟି ସପୋର୍ଟ ଷ୍ଟାଫ୍ ଏବଂ ଫେଡେରେସନର ପ୍ରତିନିଧିମାନେ ସାମିଲ ହୋଇ ମହିଳା ସଶକ୍ତିକରଣର ବାର୍ତ୍ତା ପ୍ରଚାର କରିଥିଲେ।
ଶୋଭାଯାତ୍ରା ପରେ ସଦ୍ଭାବନା ସଭାଗୃହଠାରେ ଏକ ଆଲୋଚନା ଚକ୍ର ଅନୁଷ୍ଠିତ ହୋଇଥିଲା। ଏହି ସଭାରେ ଜିଲ୍ଲାପାଳଙ୍କ ସମେତ
ଲମ୍ବୋଦର ଧରୁଆ ମୁଖ୍ୟ ଉନ୍ନୟନ ଅଧିକାରୀ,
ଶ୍ରୀମତୀ ଏସ୍. ଗୀତା ଜିଲ୍ଲା ସମାଜ କଲ୍ୟାଣ ଅଧିକାରୀ ,
ସୁନୀଲ କୁମାର ମଲ୍ଲିକ ମିଶନ ଶକ୍ତି ଜିଲ୍ଲା ପ୍ରକଳ୍ପ ସଂଯୋଜକ , ଅଧିକାରୀ ପ୍ରମୁଖ ଉପସ୍ଥିତ ଥିଲେ।

ଏହି ଅବସରରେ ଜିଲ୍ଲାପାଳ ଶ୍ରୀ ଦାଶ ନିଜ ଅଭିଭାଷଣରେ ମହିଳାମାନଙ୍କୁ ପ୍ରଶଂସା କରି କହିଥିଲେ ଯେ,
“ଆଜିର ମହିଳା କେବଳ ପରିବାର ଚଳାଇବାରେ ସୀମିତ ନୁହଁନ୍ତି। ମିଶନ ଶକ୍ତି ସହାୟତାରେ ସେମାନେ ଆଜି ‘ଲକ୍ଷପତି ଦିଦି’ ହୋଇପାରିଛନ୍ତି। ଆଗାମୀ ଦିନରେ ସେମାନେ ଶିଳ୍ପପତି ଭାବେ ଉଭା ହୋଇ ସମାଜର ମୁଖ୍ୟ ସ୍ରୋତରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିବେ।” ସେ ଆହୁରି ମଧ୍ୟ ସୂଚନା ଦେଇଥିଲେ ଯେ, ଚଳିତ ଆର୍ଥିକ ବର୍ଷରେ ସ୍ୱୟଂ ସହାୟକ ଗୋଷ୍ଠୀମାନଙ୍କୁ ଋଣ ପ୍ରଦାନ କ୍ଷେତ୍ରରେ ନୂଆପଡ଼ା ଜିଲ୍ଲା ପ୍ରଶାସନ ଅଭୂତପୂର୍ବ ସଫଳତା ପାଇଛି। ମହିଳାମାନେ ଋଣକୁ ପୁଞ୍ଜିରେ ପରିଣତ କରି ନିଜକୁ ଏବଂ ସମାଜକୁ ସଶକ୍ତ କରିବାକୁ ସେ ପରାମର୍ଶ ଦେଇଥିଲେ।
କାର୍ଯ୍ୟକ୍ରମରେ କିଛି ସଫଳ “ଲକ୍ଷପତି ଦିଦି” ସେମାନଙ୍କ ଜୀବନ ସଂଘର୍ଷ ଓ ସଫଳତାର କାହାଣୀ ଶୁଣାଇଥିଲେ। ମିଶନ ଶକ୍ତି ମାଧ୍ୟମରେ ସେମାନେ କିପରି ସ୍ୱାବଳମ୍ବୀ ହୋଇପାରିଛନ୍ତି, ତାହା ଅନ୍ୟ ସଦସ୍ୟାମାନଙ୍କୁ ଉତ୍ସାହିତ କରିଥିଲା ଓ ପ୍ରେରଣା ଯୋଗାଇ ଥିଲା। କାର୍ଯ୍ୟକ୍ରମ ଶେଷରେ ଜିଲ୍ଲା ପ୍ରକଳ୍ପ ସଂଯୋଜକ ସୁନୀଲ କୁମାର ମଲ୍ଲିକ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ। ଏହି କାର୍ଯ୍ୟକ୍ରମ ଜିଲ୍ଲାରେ ମହିଳାଙ୍କ ସାମାଜିକ ଓ ଆର୍ଥିକ ସ୍ଥିତିରେ ଏକ ବଡ଼ ପରିବର୍ତ୍ତନ ଆଣିବ ବୋଲି ଆଶା କରାଯାଉଛି।